स्थानीयको सक्रियतामा पदमार्ग मर्मत

गत असारदेखि अवरुद्ध भएको पदमार्ग स्थानीयवासीले श्रमदान गरेर मर्मत गरी आइतबारदेखि खुलाएका हुन् । पहिरो र बाढीले भत्काएको पदमार्ग मर्मतका साथै विभिन्न ठाउँमा अस्थायी पुल निर्माण गरेर पदमार्गमा सहजरुपमा आवतजावत गर्न सकिने स्थानीय बासिन्दा बोमबहादुर पुनले जानकारी दिनुभयो ।

भिरबाट खसेको ढुङ्गाले लागेर दोभानस्थित म्याग्दी नदी माथि रहेको झोलुङ्गे पुल छिनालेकाले सो स्थानमा काठको अस्थायी पुल (साँघु) बनाएर खोला तर्न सकिने बनाइएको छ । यसैगरी अन्य ठाउँमा खसेको पहिरो र बाढीका कारण भत्किएको पदमार्ग समेत मर्मत गरिएको छ ।

जिविसको रु एक लाख सहयोगका साथै बगरका ३५ घरधुरीले एक हप्तासम्म श्रमदान गरेर पदमार्ग मर्मत गरेका हुन् । म्याग्दीको मुदी हुँदै संसारको सातौं अग्लो धौलागिरि हिमालको आरोहण र मुस्ताङ जानका लागि यो पदमार्ग प्रयोग हुने गर्छ । असोज, कात्तिक, चैत र वैशाख महिनामा यो पदमार्गमा पर्यटक आउने गर्छन् । रासस