काठमाडौँ, ३ कात्तिक । काठमाडौँ–निजगढ द्रुतमार्गअन्तर्गत ललितपुर खोकना, सैंबु र बुङ्मतिका स्थानीयले आज प्रधानमन्त्री पुष्पकमल दाहाललाई भेटी आफ्ना समस्या र मागबारे ध्यानाकर्षण गराएका छन् ।
नेकपा (माओवादी केन्द्र) का प्रवक्ता पम्फा भुसालको नेतृत्वमा गएको सर्वपक्षीय सरोकार समितिले द्रुतमार्ग निर्माणका लागि जग्गा अधिग्रहण गर्दा सरकारले दिने भनिएको मुआब्जा निकै कम भएको भन्दै प्रधानमन्त्रीको ध्यानाकर्षण गराएको हो ।
भेटमा सरोकार समितिका पदाधिकारीले जग्गा अधिग्रहण गर्दा प्रचलित मूल्यअनुसारको मुआब्जा दिन, दु्रत मार्ग निर्माण गर्दा स्थानीय संस्कृति एवम् सम्पदाको संरक्षण गर्न र वातावरणीय प्रभाव कम गर्न पनि आग्रह गरेका थिए ।
प्रधानमन्त्री दाहालले द्रुतमार्ग राष्ट्रिय गौरवको आयोजना भएको र सरकारको प्राथमिकतामा रहेको बताउँदै छिट्टै द्रुतमार्गसम्बन्धी बैठकको आयोजना गरी योजनाको कार्यान्वयन र स्थानीय सरोकारवालाको चासोबारे छलफल गर्ने वचनबद्धता व्यक्त गर्नुभएको थियो । रासस
