४ कात्तिक,फलेवास (पर्वत)। बढ्दो सवारी चाप व्यवस्थापनका लागि दक्षिण पर्वतको हुवासमा अस्थायी ट्राफिक प्रहरी पोस्ट स्थापना गरिएको छ ।
वालिङ–हुवास–बर्राचौर सडकखण्डअन्तर्गत हुवासमा अस्थायी ट्राफिक प्रहरी पोस्ट स्थापना गरिएको हो । उक्त सडकखण्डमा वालिङ हुँदै पोखरा, बुटवल, नारायणघाट, काठमान्डौँका लागि लामो दूरीका आठ बस तथा छोटो दूरीका दर्जनौँ जिप सञ्चालनमा रहेका छन् ।
हुवासमा इलाका प्रशासन कार्यालयको सेवारम्भ भएसँगै सवारी र यात्रुको सङ्ख्यामा पनि वृद्धि हुँदै जाँदा हुनसक्ने सम्भावित सडक दुर्घटना न्यूनीकरणका लागि ट्राफिक प्रहरी पोस्टले नियन्त्रणको भूमिका खेल्ने इप्रका हुवासका प्रहरी निरीक्षक खगेन्द्र खड्काले बताउनुभयो ।
अस्थायी प्रहरी पोस्ट स्थापनाका लागि स्थानीय समाजसेवी डिल्लीराम न्यौपानेले जग्गादान गर्नुभएको छ भने भवनको सौजन्य पैयूँकालिका हार्डवेयरका सञ्चालक नरभूपाल काफ्लेले गर्नुभएको छ । रासस
