हामी सबैकाे संसारन्यूज

२८ कात्तिक, गोरखा । सामान्यत : कुनै विवाद वा झमेला सुल्झाउन पहिलो सम्बन्धित निकायमा निवेदन दिने गरिन्छ । गोरखाको एउटा दुर्गम गाउँमा भने परम्परादेखि भिन्न चलन रहिआएको छ । गाउँस्तरको विवाद सुल्झाउन ‘टीका’ दिने चलन छ । टीकामा खादा, गच्छे अनुसार पैसा र एक बोतल रक्सी हुन्छ ।
एकसाता अघि वृद्ध भत्ता वितरणमा चुमनुब्री गाउँपालिका ६ चुम्तेतस्थित चुम्लिङ पुगेका वडाअध्यक्ष लोप्साङ लामालाई स्थानीय फुर्पा लामाले पहेँलो खादाभित्र १ सय ५० रुपैयाँ बेरेर राखिदिइन् । ‘टीका दिएसँगै वडाअध्यक्ष लामा समक्ष उनले आफ्ना समस्या मौखिक रुपमा राख्न सुरु गरिन् । सधैजसो छिमेकी सँग खानेपानीको विषयमा विवाद हुने गरेकाले छलफलबाट सुल्झाईदिनुपर्ने उनको माग थियो । ‘टीका’ दिएको भोलीपल्टै वडाअध्यक्ष लामाले दुवै पक्षलाई बोलाएर यसअघिका वर्षजस्तै मिलेर पानी प्रयोग गर्न सहमति गराए ।