हामी सबैकाे संसारन्यूज

६ मंसीर, प्युठान । अल्लोको टोपी, अल्लैको कोट । सके झोला र अन्य उत्पादन पनि अल्लोकै । नौबहिनी गाउँपालिकाले जनप्रतिनिधिलाई बैठकमा अल्लोकै उत्पादनलाई प्राथमिकता दिने नीति छ । ‘अल्लो, उद्योगलाई प्रोत्साहन गर्न यो निर्णय लिएका हौं,’ गाउँपालिका अध्यक्ष शिव रिजालले भने, ‘गाउँपालिकाका ४४ प्रतिनिधिले गाउँसभा र अन्य बैठकमा अल्लोकै लुगा लगाउन थालेका छन् ।’
गाउँका वनमा अल्लो प्रशस्तै छन् । गाउँपालिकाले उद्यमीलाई पनि सहयोग गर्ने नीति लिएको छ । ‘गतवर्ष दुई उद्यमीलाई २÷२ लाख रुपैयाँ सहयोग गरेका थियौं,’ उनले भने, ‘नौबहिनीको पहिचानै अल्लो हो ।’
अल्लोको कामले धेरै महिलाले रोजगार पाएका छन् । अल्लोको प्रशोधित धागो अन्तराष्ट्रिय बजारसम्म पुग्ने गरेको छ । निजी फर्मले घरमै आएर धागो किन्छन् । ‘जिल्ला बाहिर मात्र होइन, थाइल्याण्ड, मलेसिया,साउदी,कतार, अस्ट्रेलिया, इजरायल र सिंगापुरसम्म पनि धागो निर्यात हुने गरेको छ,’ गाउँपालिकाका प्रमुख प्रशासकिय अधिकृत थालेश्वर भण्डारीले भने ।