हामी सबैकाे संसारन्यूज

६ मंसीर, मुगु । हुम्लाको सुर्के गाउँपालिका २ उनपानीकी ४५ वर्षीया कन्निसिला फडेरा आवश्यक बन्दोबस्ती सामग्री पिठ्युमा बोकेर ५ दिनपछि गमगढी आइपुगिन् । गमगढीबाट खसी र भेडामा चामल बोकाएर घर पुग्न उनलाई थप पाँचदिन लाग्छ । उनीसँगै चामल किन्न आएकी ५० वर्षीया भ्याल्ली फडेरी चामल लिएर गाउँ फर्किने तयारीमा छन् ।
यी दुई मात्र होइन, हुम्लाको सर्केगाड र चंखेली गाउँपालिकाबासी पनि चामल लिन १० दिन पैदल हिडेर गमगढी आईपुग्छन् । मुगुबाट दुःख कष्ट गरेर लिएको चामल एक महिना पनि नपुग्ने उनीहरु बताउँछन् ।
मुगु सदरमुकाम आएर चामल लिनुको विकल्प छैन । स्थानीयका अनुसार सर्केगाड डिपोमा चामल ढुवानी नभएको लामो समय भयो । स्थानीयलाई सिमीकोट पुग्न तीनदिन लाग्छ तर त्यहि पनि चामल नपाउँदा अधिकांश उपभोक्ता मुगु नै आउनु पर्छ । गमगढीमा प्रतिकिलो ५० रुपैयाँमा पाइने चामल गाउँपुग्दा २०० रुपैयाँ किलो पर्ने स्थानीयले बताएको आजको कान्तिपुर दैनिकमा मुगुबाट राजबहादुर शाही लेख्छन् ।