हामी सबैकाे संसारन्यूज

६ मङ्सिर, संयुक्त राष्ट्रसङ्घ, अमेरिका । अफगानिस्तानको राजधानी काबुलमा मङ्गलबार भएको आत्मघाती आक्रमणको संयुक्त राष्ट्र सङ्घको सुरक्षा परिषद्ले निन्दा एवं भत्र्सना गरेको छ ।

यस आक्रमणमा परी कम्तीमा ५० जनाको मृत्यु हुनाका साथै ८३ व्यक्ति घाइते भएका थिए । मुसलमानहरूका धर्मगुरु मोहमदको जन्मोत्सवको उपलक्ष्यमा हुने समारोहका लागि एक होटेलमा भेला भएर छलफलमा बसेका व्यक्तिहरूलाई लक्षित गरी यो आक्रमण भएको थियो ।

यस आक्रमणमा ज्यान गुमाएका व्यक्तिका परिवारजन र अफगान सरकारलाई १५ देशका सदस्य रहेको यस सुरक्षा परिषद्ले गहिरो सहानुभूति व्यक्त गरेको छ । यस आक्रमणबाट घाइते भएका व्यक्तिको पनि शीघ्र स्वास्थ्य लाभको कामना गरिएको सुरक्षा परिषद्द्वारा प्रकाशित विज्ञप्तिमा जनाइएको छ ।

विस्फोट गराइएको समयमा सो स्थानमा करिब एक हजार मानिस भेला भएका प्रत्यक्षदर्शीहरूलाई उद्धृत गर्दै स्थानीय सञ्चारमाध्यमले जानकारी दिएको छ ।

अफगानिस्तानमा तालिबान तथा इस्लामिक स्टेट्स (आईएस) लडाकू समूहले नियमितजसो बम हमला गर्दै आएका छन् । यसअघि गत नोभेम्बर १२ का दिन प्रहरी चौकीनजिकै भएको एक आत्मघाती आक्रमणमा परी कम्तीमा १० जनाको ज्यान गएको थियो ।

अफगानी तालिबान समूहसँग शान्तिवार्ताको पहल भइरहे पनि अफगानिस्तानमा आतङ्ककारी आक्रमणमा कुनै कमी आएको छैन ।

केहीदिन अगाडि मात्र अफगान तालिबानसँग अमेरिकी विशेषदूत जाल्मे खलिलजादले खाडी राष्ट्र कतारमा वार्ता गरेका थिए ।

कतारमा भएको वार्ताका बारेमा कुनै सन्दर्भ उल्लेख नगरी अमेरिकी दूत खलिलजादले काबुलमा वार्तामा बस्न चाहने सबै अफगानी समूहसँग छलफल गरिरहेको पत्रकारसँग भनेका थिए । अहिले मेलमिलाप र शान्तिको अवसर आएको पनि उनले प्रष्ट पारेका थिए ।

अमेरिकी नेतृत्वको फौजले तालिबान सत्ता अपदस्थ गरेको १७ वर्ष पूरा भइसकेको छ, तर अहिले अफगानिस्तानको झण्डै आधा भाग तालिबान विद्रोहीको नियन्त्रणमा छ । तालिबानले गरेका स्थानीय सुरक्षा फौज र सरकारी अधिकारीमाथिको आक्रमणका कारण दिनहुँ ठूलो सङ्ख्यामा हताहत भइरहेको छ ।