Sansar News
१५ फागुन, काठमाडौं । भारत र पाकिस्तानबीचको तनाब बारे नेपाल सरकारले आफ्नो धारणा सार्वजनिक गरेको छ । परराष्ट्र मन्त्रालयद्वारा बुधबार जारी विज्ञप्तीमा वार्ताका माध्यमबाट हुनुपर्नेमा जोड दिइएको छ ।
यही फागुन २ गते जम्मुकाश्मिर राज्यको पुलवामा सुरक्षाफौजमाथि भएको आतङ्वादी आक्रमणपछि भारत र पाकिस्तानबीच बढेको तनाबले नेपाल सरकारलाई चिन्तित तुल्याएको बताउँदै परराष्ट्र मन्त्रालयले शान्तिपूर्ण माध्यमबाट परिस्थितिलाई सामान्य बनाउन आग्रह गरेको छ ।
दक्षिण एशियाली क्षेत्रीय सहयोग सङ्गठन (सार्क) को अध्यक्षका नाताले नेपाल दक्षिण एशियामा शान्ति र स्थायित्व कायम हुनुपर्छ भन्नेमा दृढ रहेको उल्लेख गर्दै उक्त मन्त्रालयले जारी गरेको वक्तव्यमा दुवै पक्षलाई अत्यधिक संयमित हुन आग्रह गरेको छ । दक्षिण एशियाको शान्ति र सुरक्षामा जोखिम हुने कुनै किसिमका गतिविधिमा संलग्न नहुन पनि सरकारले भारत र पाकिस्तानसँग अनुरोध गरेको छ ।
फागुन २ गतेको आतङ्वादी आक्रमणको नेपाल सरकारले कडा शब्दमा निन्दा गरेको थियो ।
वि.सं.२०७५ फागुन १५ बुधवार २०:४९ मा प्रकाशित
