हामी सबैकाे संसारन्यूज

२३ फागुन, काठमाडौं । अख्तियार दुरुपयोग अनुसन्धान आयोगले तत्कालीन आयुक्त राजनारायण पाठकले घुस लिएको प्रकरणमा उपराष्ट्रपति नन्द बहादुर पुनको छोरा दीपेश लगायत विभिन्न व्यक्ति सँग बयान लिने तयारी गरेको छ ।
अख्तियारले उपराष्ट्रपति पुनका छोरा दीपेश र अखिल क्रान्तिकारी नेता कैलाश मगर तथा उक्त प्रकरणमा मुछिएका दर्जन भन्दा बढीसँग बयान लिन लागेको हो ।
आयोगले पाठकलाई घुस बुझाउने चाँगुनारायणस्थित नेपाल इन्जिनियरिङ कलेज भक्तपुरका अध्यक्ष लम्बोदर न्यौपानेसँग विहिबार बयान लिने भएको छ । राजपा नेपालका नेता ज्ञानेन्द्र झाले न्यौपानेको ७८ लाख रुपैयाँ पाठकलाई बुझाएका थिए ।
अष्ट्रेलियामा स्थायी बसोबासको अनुमति (पिआएर) पाएका न्यौपाने र अर्का संचालक दीपक भट्टराईबीच इन्जिनियरिङ कलेजको स्वामित्वका विषयमा विवाद छ । न्यौपाने पक्षले इन्जिनियरिङ कलेजलाई निजी भन्दै आएको छ भने भट्टराई पक्षले समुदायबाट सञ्चालित कलेज गैरनाफामुलक भएको बताउँदै आएको छ । विहिबारको अन्नपूर्णपोष्ट दैनिकमा सुरेन्द्र काफ्लेले लेखेका छन् ।