हामी सबैकाे संसारन्यूज

१३ चैत, राजविराज । १४ वर्षीया बालिका ‘थाहै नपाई’ गर्भवती भएकी छन् । पेटको तल्लो भागमा पीडा भएको बताएपछि आमाले उनलाई डाक्टर कहाँ पुर्याएकी थिइन् । भिडियो एक्सरे गर्दा गर्भ बसेको देखिएपछि उनको परिवार चिन्तामा डुबेको छ ।

मजदुरीमा काम गर्न जाने गरेकी आमाले छोरी बलात्कृत भइरहेको ढिलो मात्र थाहा पाएकी थिइन् । बालिकालाई थप स्वास्थ्य परीक्षणका लागि सप्तरी राजविराजस्थित गजेन्द्र नारायण सिंह अस्पतालमा ल्याएकी थिइन् । गर्भ बसेको चिकित्सकले बताएका छन् । ‘बालिकाले आफूसँग के भयो र परिणाम के हुन्छ भन्ने थाहा पाइनन,’ अस्पतालमा सञ्चालित ओसीएमसीकी फोकल पर्सन मनीषा सिम्खडाले भनिन्, ‘गर्भवती भएको कुरा धेरैपछि थाहा भयो ।’

हनुमान नगर कंकालिनी ४ स्थित ठूली आमाको घरमा बसेका बेला सोहि गाउँमा पाहुना गएका छिन्नामस्ता गाउँपालिका ६ कुपहीका २१ वर्षीय प्रदीप कुमार मण्डलले यौन सम्पर्क राखेको पीडितको भनाई छ । उनका अनुसार पछि घरमा ठूला व्यक्ति नभएको मौका पारी ती युवा आउन थाले । उनको भाईबहिनीलाई पैसा दिई बाहिर पठाएर बालिकासँग यौन सम्पर्क गर्दै आएका थिए ।

पीडितकी आमाले जिल्ला प्रहरी कार्यालयमा दिएको उजुरी दर्ता भएको छ । तर, आरोपित भारत चण्डिगढमा अध्ययनमा रहेकाले पक्राउ गर्न नसकिएको प्रहरीले जनाएको छ । बुधबारको अन्नपूर्णपोष्ट दैनिकमा मनोहर पोखरेलले राजविराजबाट लेखेका छन् ।