हामी सबैकाे संसारन्यूज

१८ चैत, काठमाडौं । आइतबार राति बारा तथा पर्सा जिल्लामा अकस्मात आएको भिषण हावाहुरी र असिनापानीमा परी मृत्यु हुने सबैको सनाखत भएको छ । गृह मन्त्रालयद्वारा जारी विज्ञप्ती अनुसार उक्त दुर्घटनामा ज्यान गुमाउनेको संख्या २७ पुगेको छ भने ६६८ जना घाइते भएका छन् । ज्यान गुमाउनेमा १० जना पुरुष, महिला ११ जना र ६ जना बालबालिका रहेका छन् ।

घाइते मध्ये २४८ जनाको प्रारम्भिक उपचार भई घर फर्किएका छन् भने ३७५ जना पर्सा र बारा जिल्लाका विभिन्न अस्पतालमा उपचार भइरहेको मन्त्रालयले जनाएको छ । त्यसमध्ये गम्भिर अवस्थाका ९ जनालाई थप उपचारका लागि नेपाली सेनाको हेलिकप्टरबाट काठमाडौँ स्थित त्रिवि शिक्षण अस्पताल महाराजगञ्जमा ल्याइ उपचार भैरहेको उल्लेख गरिएको छ ।

४६८ थान त्रिपाल र टेन्ट, लत्ता कपडा ४१३८ थान, २ रोल कपडासहित ३ ट्रक सामग्री बारा पुगेको र थप पठाइने क्रम जारी रहेको जानकारी दिँदै मन्त्रालयले विपदको बेला सबैलाई आ–आफ्नो तर्फबाट सहयोगमा जुट्न  आह्वान पनि गरेको छ ।