हामी सबैकाे संसारन्यूज

कास्की समाज स्पेनले नेपाली नयाँवर्ष २०७६ को पूर्वसन्ध्यामा एक कार्यक्रमको आयोजना गरी शुभकामना आदान–प्रदान गरेको छ ।

आइतबार सम्पन्न उक्त कार्यक्रममा समाजद्धारा प्रकाशित नयाँवर्ष २०७६ को भित्तेपात्रो समेत सार्वजनिक गरेको छ ।

समाजका अध्यक्ष केदारनाथ ढुंगानाको अध्यक्षता, नेपाली दूतावास म्याड्रिडका कार्यबाहक राजदूत हरिहरकान्त पौडेलको प्रमुख आतिथ्यता र महासचिव गोबिन्द तिमिल्सिनाको संचालन रहेको उक्त कार्यक्रममा कार्यबाहक राजदूत पौडेलले समाजले गर्दै आएका कामहरुको प्रसंसा गर्दै समुदायको हितमा निरन्तर लाग्न सुझाएका थिए ।

सोहि अवसरमा बिशेष अतिथिहरु एनआरएनए आईसीसी सदस्यद्वय मुक्त वहादुर गुरुङ, शितल भुर्तेल भुसाल, एनआरएनए स्पेनका अध्यक्ष चिन्तामणी सापकोटा र समाजका अध्यक्ष केदारनाथ ढुंगानाले संयुक्त रुपमा भित्तेपात्रोको बिमोचन गरेका थिए ।

सोहि अवसरमा बिभिन्न संघसंस्थाका अध्यक्ष तथा प्रतिनिधिहरुले आफ्ना भनाई राख्दै समाजले गर्दै आएका कामहरुको प्रंशसा गरेका थिए ।

कार्यक्रममा समाजका बिभिन्न गतिबिधिहरुमा सहयोग पुर्याउने व्यक्तित्वहरुलाई समेत सम्मान गरिएको थियो भने भित्तेपात्रोका लागि सहयोग गर्नेलाई धन्यबाद सहित प्रशंसापत्र प्रदान गरिएको थियो ।

त्यस्तै समाजले एकवर्ष सम्म गरेका कामहरुको प्रगति विवरण भिडियो दृश्यमार्फत् प्रस्तुत गर्दै समाजका भावि कार्ययोजनाका बारेमा पनि जानकारी दिइएको थियो ।