हामी सबैकाे संसारन्यूज

१४ वैशाख, काठमाडौँ । सुत्केरी भएको १ हप्तामै श्रीमान गुमाएर अलपत्र परेकी मेचीनगर झापाकी देवी मेचेलाई घर हस्तान्तरण गरिएको छ । बैशाख ९ गते एक कार्यक्रमका बिच देवी मेचेलाई पक्की घर हस्तान्तरण गरिएको हो ।

बिजुलीको करेन्टबाट एक हात गुमाएकी मेचेले श्रीमानसँग सन्तान जन्मिएको खुशीयाली साट्न नपाउँदै श्रीमानबाट एक्लीनु परेपछि उनको बिचल्लीका खबर संचारमाध्यममा आए । ३ वर्षकी सानी छोरी र काखकी नवजात शिशु, उनको दयनीय अवस्थामा देशविदेशमा बस्ने नेपालीहरुले चासो देखाए ।

मेचेको खबर सुनेपछि रगत दिएर हजारौँ मान्छेको ज्यान जोगाउने अभियानमा संसारभर सन्देश छर्दै हिडेका अन्तर्राष्ट्रिय ब्लड डोनर अर्जुनप्रसाद मैनालीले सहयोग गर्ने सोच बनाए । अमेरिकाबाट अर्जुन मैनालीले साथीहरुबाट एक लाख बाउन्न हजार सहयोग जुटाइ पठाए । त्यसैगरी विभिन्न व्यक्तिहरुबाट मेचेको नाममा उठेको रकमबाट छ लाख पच्चिस हजार रुपैयाको लागतमा जस्ताको छानो सहितको पक्की घर निर्माण गरिएको हो ।

घर हस्तान्तरण कार्यक्रममा बोल्दै मेचीनगर नगरपालिकाका प्रमुख बिमल आचार्यले सहयोगिहरुलाई धन्यवाद भन्दै स्थानिय सरकारले गर्न नसकेको काम स्थानियवासिहरुले आँफैले गरेकोमा खुशी ब्यक्त गरेका थिए ।

देवी मेचेले तीन बर्षकी ठुलि छोरी र काखमा हुर्किदै गरेकी सानी छोरीलाई लिएर आसुँ झार्दै आफ्ना लागि बनाइ दिएको घरमा प्रबेश गरिन् । नव निर्मित घरमा भान्छाका सबै सामान, काठको पलङ, भाडाकुडा, सौर्य उपकरण, बिजुली पंखा, सिसाको झ्याल, सिमेन्टको भुइँ, टायल बिछ्याइएको शौचालय, धारा लगायतको ब्यबस्था छ ।

कात्तिक १३, २०७५ मा झापा मेचीनगरकी देवी मेचे हप्ता दिनकी सुत्केरी हुँदै गर्दा बिधुवा भइन् । देवी बाह्र बर्ष अगाडि अर्काको घरमा काम गर्दा बिजुलीको करेन्टले दाहिने हात चुडिएर अपाङ्ग बनेकी थिइन । गरीबिको कारणले देवीले महिनौ देखी घरभाडा तिर्न सकेकी थिइनन् । मजदुर श्रीमान कृष्ण घिमिरेको निधनले देवी माथि ठूलो बज्रपात पर्‍यो । केही नहुनेको दैव हुन्छ भनेझै स्थानियवासी ती देवीलाई सहयोग गर्न तम्सिय । विश्वप्रकाश शर्माले मिलनचोकमा सात धुर जग्गा किनिदिए । बिजय डालमियाको संयोजकत्वमा घर निर्माण समिती बनाइएको थियो ।