हामी सबैकाे संसारन्यूज

दुबईमा पक्राउ परेका गैरआवसीय नेपाली संघ (एनआरएन) यूएईका अध्यक्ष रमेश श्रेष्ठ रिहा भएका छन् । शुक्रबार पक्राउ परेका श्रेष्ठ आइतबार बिहान ११ बजे रिहा भएका छन् ।

दुबईमा म्यानपावर व्यवसाय गर्दै आएका झापाका शंकर श्रेष्ठसँगको व्यवसायिक लेनदेनमा भएको समस्याका कारण आफूलाई पक्राउ गरिएको र कारोबार मिलाएर आफू रिहा भएको अध्यक्ष श्रेष्ठले जानकारी दिएका छन् ।

आफूले लिएको पैसा फिर्ता दिन दुई महिनापछिको चेक दिएको तर नगद दिन शंकर श्रेष्ठलाई गएको हप्ता नै आफ्नो कार्यालयमा चेक लिएर आउन भने पनि उनी नआएको र पक्राउ गराएर आफ्नो चरित्र हत्या गर्न खोजेको अध्यक्ष श्रेष्ठले बताए । तर यूएई प्रशासनले आफूलाई सोधपछु गरेको र सकुशल रिहा गरेको श्रेष्ठले बताए ।

झापाका शंकर श्रेष्ठले भने आफूसँगको आर्थिक लेनदेन दुई वर्षसम्म नमिलाएकाले प्रहरीमा उजुरी दिएको बताए । आफूले कसैको चरित्र हत्या गर्न नखोजेको र आफ्नो सरोकार पैसा फिर्ता गराउनु मात्रै रहेको श्रेष्ठको भनाई छ ।

दुबै जनाले यूएईमा म्यानपावर व्यवसाय सञ्चालन गर्दै आएका छन् । रमेश श्रेष्ठ र व्यवसायिक साझेदारी गरिरहेका व्यवसायी शंकर श्रेष्ठबीच लामो समयदेखि कारोबारका विषयमा विवाद थियो ।

धुर्मुस–सुन्तली साँझ कार्यक्रम चलिरहेका बेला श्रेष्ठ कसैले बोलाएपछि बाहिरिएका थिए । त्यसपछि श्रेष्ठ नफर्किएको र उनी पक्राउ पर्नुमा कार्यक्रमसँग कुनै सम्बन्ध नभएको भन्दै आयोजकले सामाजिक काममा विवाद ल्याउन षडयन्त्र भएको बताएको छ ।