Sansar News
२० बैशाख, काठमाण्डौं । बंगालको खाडीमा ओडिसाको तटिय क्षेत्र नजिकै रहेको चक्रवात ‘फानी’ नेपाल नपसेपनि यसले नेपालका विभिन्न क्षेत्र प्रभावित हुने बताइएको छ ।
भारतको ओडिसा क्षेत्रमा मध्यान्ह भित्रने फानी फेरि उत्तर–पूर्वी दिशातर्फ जाने क्रममा कमजोर बन्दै जाने पनि जल तथा मौसम पूर्वानुमान महाशाखाले जनाएको छ ।
उक्त चक्रपात नेपाल पस्ने सम्भावना नरहेपनि यसको प्रभावले पूर्वी र मध्य क्षेत्रमा आज र भोली भारी वर्षा सहित मेघ गर्जन र चट्याङ पर्ने सम्भावना रहेको छ ।
देशको पश्चिमी क्षेत्रमा आज पश्चिमी वायुको प्रभाव रहने हुँदा केहि स्थानहरुमा हल्का देखि मध्यम वर्षाको सम्भावना देखिन्छ र हिमाली भू भागमा पनि हिमपातको सम्भावना रहेको छ । आइतबारदेखि देशभर मौसममा क्रमिक रुपमा सुधार आउने सम्भावना छ ।
वि.सं.२०७६ वैशाख २० शुक्रवार १०:५२ मा प्रकाशित
