हामी सबैकाे संसारन्यूज

अमेरिकी मध्यस्थतामा ल्याइएको युद्धविराम प्रस्तावअनुसार यसअघि यमनी सरकार युद्धविराम गर्न असहमत देखिए पनि विश्वव्यापी दबाबका कारणपछि यसप्रति सकारात्मक बन्दै शनिबार दिउँसो १२ बजेदेखि लागू हुने गरी युद्धविराम सुरु भएको दुवै पक्षले जनाएका छन् ।

अमेरिकी पहलमा अघि सारिएको युद्धविराम प्रस्तावलाई यमनी सरकारले सत्ताधारी समूहको आधिकारिकतालाई बेवास्ता गरेको जनाउँदै अस्वीकार गरेको थियो ।

हाल सम्झौता भई स्थायी कार्यान्वयनमा ल्याउन अमेरिकी विदेशमन्त्री मध्यपूर्वी देशको नेतृत्वसँग छलफल गरिरहेको बताइएको छ ।

यस पहिले केरीले ओमनमा विद्रोहीसँग कुराकानी गरिसकेपछि उक्त प्रस्तावलाई अघि सार्नुभएको थियो ।

यमन युद्धविरामको घोषणा गतवर्षदेखि यमनको सरकारलाई सैन्य सहयोग दिँदै आएको गठबन्धन नेतृत्वले गरेको छ ।

युद्धविराम तत्काल ४८ घन्टाका लागि गरिएको भए पनि यदि विद्रोहीले आफ्नो नियन्त्रणमा रहेको भूमिमा खाद्यान्न, औषधिलगायतका आधारभूत सामग्रीाई आपूर्तिमा रोक नलगाए लम्बिन सक्ने गठबन्धन नेतृत्वले जारी गरेको विज्ञप्तिमा जनाइएको साउदी प्रेस एजेन्सीले जनाएको छ ।

“ओमनको मस्कटमा भएको सहमतिअनुसार हामी आफ्नो समूहबाट युद्धविरामका लागि गरेको प्रबिद्धतालाई यदि अर्को पक्ष (सरकार)ले पालना गरमा कार्यान्वयनमा लग्न तयार छौँ” – हुठी विद्रोहीका ब्रिगेडियर जनरल शरफ लकमानले भन्नुभयो ।

यसअघि युद्धविरामका लागि गरिएका छपटकका प्रयासमा राष्ट्रपति अवेद्रेब्वो मन्सुर हाडीले संयुक्त राष्ट्रसङ्घद्वारा ल्याइएको विद्रोही सम्मिलित संयुक्त सरकार बनाउने प्रस्तावलाई यमनको हितमा नभएको जनाउँदै अस्वीकार गर्नुभएको थियो । हाडीले संयुक्त सरकार बनाउँदा आफ्ना वैधतामाथि बेवास्ता गरिएको महसुस गर्दै अघिल्ला प्रस्तावलाई अस्वीकार गर्दै आउनुभएको थियो ।

यमनमा द्वन्द्व सुरु भएयता करिब २० महिनाको समयमा सात हजार नागरिकको मृत्यु भएको छ भने करिब ३७ हजार मानिस घाइते भएका छन् । रासस÷एपी