Sansar News
काठमाडौँ । पुष्पपराग साहित्य प्रतिष्ठान को आयोजनामा १२ औँ रचना वाचन श्रृङ्खला सम्पन्न भएको छ । कार्यक्रम काठमाडौँस्थित कौटिल्य ग्लोबल स्कूल मा सम्पन्न भएको हो ।
प्रतिष्ठानका सचिव मनिष कुमार शर्मा को सञ्चालनमा सम्पन्न कार्यक्रममा विभिन्न विधाका साहित्यकार तथा सर्जकहरूको उपस्थिति रहेको थियो । कार्यक्रममा २७ जना सर्जकले आफ्ना कविता, गजल तथा अन्य साहित्यिक रचनाहरू वाचन गरेका थिए । सहभागी सर्जकहरूले समाजका विविध पक्ष, मानवीय संवेदना, वर्तमान सामाजिक परिवेश तथा जीवनका अनुभूतिहरूलाई आफ्ना रचनामार्फत प्रस्तुत गरेका थिए ।
कार्यक्रमका सभाध्यक्ष तथा प्रतिष्ठानका अध्यक्ष टिएन भट्ट ले साहित्य समाज परिवर्तनको महत्वपूर्ण माध्यम भएको उल्लेख गरे । उनले साहित्यले समाजमा सकारात्मक चेतना फैलाउने र मानिसहरूलाई सोच्न तथा परिवर्तनतर्फ प्रेरित गर्ने भूमिका खेल्ने बताए ।
अध्यक्ष भट्टले प्रत्येक सर्जकले लेखनमार्फत समाजमा कुनै न कुनै मोडमा परिवर्तन ल्याउन सक्ने विश्वास व्यक्त गर्दै साहित्य सिर्जना निरन्तर जारी राख्न साहित्यकारहरूलाई आग्रह गरे । उनले साहित्य समाजको दर्पण मात्र नभई मार्गदर्शक पनि भएको उल्लेख गरे ।
कार्यक्रममा सहभागी सर्जकहरूले आ–आफ्ना रचनाहरू वाचन गर्दै साहित्यिक वातावरणलाई उत्साहपूर्ण बनाएका थिए । रचना वाचनका क्रममा श्रोता तथा साहित्यप्रेमीहरूले सर्जकहरूको सिर्जनात्मक प्रस्तुतिलाई सराहना गरेका थिए ।
पुष्पपराग साहित्य प्रतिष्ठानले नियमित रूपमा साहित्यिक कार्यक्रम आयोजना गर्दै साहित्यिक सिर्जनशीलतालाई प्रोत्साहन गर्दै आएको जनाएको छ । संस्थाले आगामी दिनमा पनि यस्ता रचना वाचन कार्यक्रम तथा साहित्यिक गतिविधिहरूलाई निरन्तरता दिने जनाएको छ ।
वि.सं.२०८२ फागुन ३० शनिवार १५:४३ मा प्रकाशित
