हामी सबैकाे संसारन्यूज

सारा बिश्वको नजर अहिले प्रधानमन्त्री ईमरान खान मार्फत पाकिस्तानमा परेको छ । भ्रष्टाचार र राजनैतिक तथा धार्मिक अतिबादका कारण युगौंदेखि अस्थिरतामा अल्मलिएको आणविक शक्ति राष्ट्र पाकिस्तान युगसापेक्ष सामाजिक तथा आर्थिक विकास र समृध्दीको मार्गमा आशातितरुपमा कहिल्यै अगाडी बढ्न सकेन ।

करिब १९ बर्ष अनवरत अनि अविछिन्नरुपमा जनताको माझ काम गरेर उनले अन्ततस् पाकिस्तानी जनताको मन जितीछाडे । राजनीति मार्फत रातारात शक्ति र सत्तामा पुग्न हतारिने नेपालका नयाँ पार्टीका सेलेब्रिटी नेताहरुले उनको त्यो अनवरत संघर्षबाट उचित सिक्नु पर्दछ कि राजनैतिक सफलता दैवीशक्ति या चमत्कारबाट होइन व्यक्तिको ईमान र धैर्यताबाट प्राप्त हुन्छ र त्यसको आधार भनेको सर्वशक्तिमान जनताहरु नै हुन ।

आज रोज गार्डेनमा अमेरिकी राष्ट्रपति डोनाल्ड जे ट्रम्पसंग समकक्षीको हैसियतमा भेट गर्दा उनले प्रस्तुत गरेका चट्टानी अडान र प्रस्तुतीले उनको राजनैतिक क्षमताको थप पुष्टी गर्यो । साधारणतया साना तथा अबिकशित तेश्रो बिश्वका राष्ट्राध्यक्षहरुले यस्ता अडिला अनि शालीन प्रस्तुती निक्कै कमले गर्ने गरेका छन ।

आफ्नो अमेरिकी भ्रमणमा हुने सक्ने फजुल खर्च बचाउन उनले सामान्य नागरिक सरह ब्यबसायिक वायुसेवाको प्रयोग गरेदेखि ठुला होटलमा नबसेर राजदुतावासमै बसेर उनले यसै चर्चा कमाएकै थिए । उसो त कास्मिर क्षेत्रमा भएको गोलाबारी र तनाबको बेला उनले भारतसंग खेलेको कुटनैतिक भूमिकाले पनि उनको उचाई बढाएको थियो ।

ईमरान खानको जीतको मात्र होइन निरन्तर कायम भएको लोकप्रियताको आधार भनेको उनको भ्रष्टाचार बिरुद्धको उनको ‘सुन्य सहनशिलता’को नीति र प्रतिज्ञा नै हो । मुस्लिम लीगका नेता तथा पुर्व प्रधानमन्त्री नवाज सरिफ, पूर्वराष्ट्रपति असिफ अली जर्दारी र पाकिस्तानका पूर्वप्रधानमन्त्री शाहिद खक्वान अब्बासी लगायत थुप्रै ठुला नेताहरु अहिले भ्रष्टाचारको आरोपमा जेल जीवन बिताई रहेका छन ।

भ्रष्टाचारले आक्रान्त भएको हाम्रो देश नेपालले पनि ईमरान खान जस्ता साहसी र ईमानी नेताको नेतृत्व पाउने हो भने अबको केही बर्षहरुमा अहिले लोकतान्त्रिक, समाजबादी अनि के के जाती विभूषण पहिरिएर राष्ट्र र राज्यको दोहन र लूट गर्ने अधिकांश नेताहरुको बास देश दोहन गरेर कमाएको आलिशान महलहरुमा होइन झ्यालखानामा हुने पक्का छ । ढिलो चाँडो हाम्रो देश नेपालले पनि त्यस्तो भ्रष्टाचारमुक्त नेतृत्व पाउने छ । यस्तो नाङ्गो लूट अबको लामो समयसम्म चल्दैन ।