हामी सबैकाे संसारन्यूज

संसारले मलाई पागल भन्छ होला
हो म पागल नै हो, भन्न देऊ
त्यसैले त म भन्दै छु
तिमी मभन्दा पैला मर्नु है ।
म पैला मरें भन…
तिम्रा हातमा सुहाउने
छनछन बज्ने ति
काँचका राता चुरा,
तिम्रो गलामा सुहाउने त्यो
हरियो,रातो पोते,
तिम्रो सिउँदोलाई सजाउने त्यो
रातो सिन्दुर
अनि
तिमीलाई सुहाउने त्यो
रातो फूलबुट्टे साडी
तिम्रा दुश्मन बन्ने छन् ।
तिमीलाई पापी यो संसारले बिधुवा भन्ने छ
सेतो बन्ने छ तिम्रो सहयात्री ।
तिमीलाई मनपर्ने ईन्द्रधनुषको
ति सातौं रंगहरुले तिमीलाई जिस्काउने छन् ।
साथ छोड्ने छ त्यो रातो रंगले
जस्को साथमा तिमी पुतली बनी फूलहरुको माँझमा रम्ने गर्छौ ।
तिमीलाई बुच्चै बनाउने छ यो पापी समाजले
जुन् मलाई पटक्कै मन पर्दैन ।
मलाई त तिम्रा गालामा
लालीगुराँस फुलेको मनपर्छ
तिम्रो त्यो मुस्कानमा खुशीहरु टल्केको मनपर्छ ।
त्यसैले त म भन्दै छु प्रिय…..
तिमी मभन्दा पैला मर्नु है ।।