Sansar News
१५ साउन, कोलम्बो । श्रीलङ्कामा इस्टर आक्रमणपछि राजिनामा दिएका श्रीलङ्काका मुसलमान मन्त्री सरकारमा फिर्ता भएका छन् ।
श्रीलङ्काकाको राष्ट्रपतिको कार्यालयले मङ्गलबार जारी विज्ञप्तिअनुसार उनीहरूले सोमबार राति नै राष्ट्रपतिबाट पुनःसपथ लिएका छन् ।
मन्त्रीबाट राजिनामा दिएका भएपनि उनीहरूको समर्थन रहेका कारण सरकारलाई कुनै असजिलो नभएको सत्ताधारी दलका नेताहरूले बताएका छन् ।
सन् २०१९ को अप्रिल २१ गते तीन ठूला होटेल र तीनवटै चर्चमा भएका विस्फोट र बन्दूक आक्रमणमा परी परी २५९ जनाको मृत्यु भएको थियो भने कैयौँ घाइते भएका थिए ।
उक्त घटनामा सम्लग्न रहेको आरोपमा १५० जनालाई नियन्त्रणमा लिई अनुसन्धान भइरहेको छ भने पक्राउ परेका अन्य कैयौँलाई अनुसन्धानपछि रिहा गरिएको छ ।
श्रीलङ्काको नौ जनाको मन्त्रीपरिषद्बाट घटनाबारे सत्य तथ्य पत्ता लगाई दोषीलाई कारबाही गर्न माग गर्दै चार पूर्णमन्त्री र केही सहायक मन्त्रीले राजीनामा दिएका थिए । यद्यपि उनीहरूले सरकारलाई दिएको समर्थन भने फिर्ता लिएका थिएनन् ।
श्रीलङ्काका उद्योग तथा वाणिज्यमन्त्री रिसाद बाथुउद्दिनमाथि पनि सम्लग्नताको आरोप लागेको थियो । रिसादप्रति ऐक्यवद्धता जनाउन त्यहाँका मुसलमान मन्त्रीले राजिनामा दिएका थिए ।
मन्त्री रिसादको सम्लग्नताको आरोपसहित विभिन्न ३० जनाले ३००भन्दा बढी मुद्दा दाखिला गरेपछि उहाँमाथि प्रहरीले छानविन गरेको थियो । प्रहरीले छानविनबाट रसिदको सम्लग्नता पुष्टि नभएको बताइसकेको छ । एपी
वि.सं.२०७६ साउन १५ बुधवार ०८:५३ मा प्रकाशित
