हामी सबैकाे संसारन्यूज

२० भदौ, काठमाण्डौं । केही दिन अघि नेपालका एटिएम प्रयोग गरेर विदेशी ह्याकरले पैसा निकालेपछि एटिएम कार्डबाट गरिने क्यास कारोबारमा राष्ट्र बैंकले कडाई गरेको छ ।

राष्ट्रबैंकका अनुसार कुनैपनि सेवाग्राहिले एटिएम कार्डबाट एक दिनमा ६० हजार तथा एकपटकमा २० हजार भन्दा बढी पैसा निकाल्न नपाउने परिपत्र जारी गरेको छ ।

यस विषयमा नेपाल राष्ट्र बैंकका प्रवक्ता लक्ष्मी प्रपन्न निरौलाले सेवाग्राहिले एटिएमबाट क्यासको कारोबार कम गरुन् र जोखिम पनि कम होस् भन्ने हेतुले यो परिपत्र जारी गरिएको बताएका छन् । कहिलेसम्म भन्ने प्रश्नमा निरौला भन्छन्, ‘कहिले सम्म भन्ने भन्दा पनि अहिलेको व्यवस्था यहि हो ।’

यसभन्दा पहिले डेभिड कार्डबाट एकपटकमा अधिकतम २५ हजार र एकदिनमा १ लाख रुपैयाँ सम्म सेवाग्राहिले निकाल्न पाउँथे ।

चिनियाँ ह्याकरले नविल बैंक, प्रभु बैंकलगायतका एटिएम बुथबाट भदौ १४ गते विहान ११ देखि ४ बजेसम्म विभिन्न ठाउँमा रहेका १७ बैंकका ६८ एटिएम ह्याक गरेका थिए । उनीहरुले १ करोड ८९ लाख ४४ हजार रुपैयाँ चोरी गरेको छानविन समितिले बुझाएको प्रतिवेदनमा जनाईको छ ।