हामी सबैकाे संसारन्यूज

१३ मंसिर, काठमाण्डौं । संविधान संशोधनको विषयमा संघीय समाजवादी पार्टी र नयाँ शक्ति नेपालले आपत्ति जनाएको छ । सोमबार नयाँ शक्ति नेपालका संयोजक डा. बाबुराम भट्टराई र संघीय समाजवादी पार्टीका अध्यक्ष उपेन्द्र यादवले संयुक्त विज्ञप्ति जारी गरी आपत्ति जनाएका हुन् ।
संविधान संशोधन गर्दा वर्गीय, जातीय, लैंगिक, भाषिक, सांस्कृतिक, धार्मिक र क्षेत्री भेद्भावहरुलाई अन्त्य गरिनु पर्ने भन्दै दुई पार्टीले आफ्नो ध्यानाकर्षण भएको जनाएको छ ।
मधेसी, थारु, आदिवासी जनजाती राष्ट्रिय आन्दोलन, पहिचानमा आधारित गठबन्धन, संयुक्त प्रादेशिक मोर्चाहरु समेत सम्मिलत सङ्घीय गठबन्धनले उठाएका राष्ट्रिय मुद्दाहरु खासगरी–राष्ट्रिय पहिचानको मान्यता, अधिकारसहितको सङ्घीयता, पूर्ण समानुपातिक प्रतिनिधित्व संसद् हुनु पर्नेमा जोड दिएको छ ।
साथै जनताद्धारा प्रत्यक्ष निर्वाचित कार्यकारी राष्ट्रपति, राज्यका सबै अङ्गमा समानुपातिक समावेशीकरण, बहुभाषिक नीति, स्वायत्तता तथा स्वशासन, सङ्घीय न्यायपालिका, प्रादेशिक क्षेत्राधिकारभित्र स्थानीय तह तथा विशेष संरचनाहरु रहने व्यवस्था, सामाजिक न्याय र समानताको अधिकार आदि सबैखाले विभेदको अन्त्य हुने गरी संविधान संशोधन हुनुपर्ने माग राखेको छ ।