हामी सबैकाे संसारन्यूज

२२ मङ्सिर, काठमाडौँ । ‘दि भ्वाइस अफ नेपाल सिजन २’ को विजेता राम लिम्बु बनेका छन् । शनिबार राजधानीको ह्यात होटलमा आयोजित ग्राण्ड फिनालेमा ३ प्रतिस्पर्धीलाई पछि पार्दै उनी दर्शकको भोटका आधारमा विजयी भएका हुन् ।

साउन ३१ देखि शुरु भएको उक्त रियालिटी शो टेलिभिजनमा रुचाइएको रियालिटी शो हो । ब्लाइन्ड राउण्ड, ब्याटल, नकआउट हुँदै लाइभ राउण्डसम्म आउँदा १२ प्रतिस्पर्धी छनोटमा परेका हुन् ।

दीप श्रेष्ठ, प्रमोद खरेल, राजु लामा र आस्था राउत निर्णायक रहेको उक्त प्रतियोगितामा उनी प्रमोद खरेलको टिमबाट प्रतिस्पर्धामा थिए भने ‘दि भ्वाइस अफ नेपाल’को अन्तिम चरणमा सनिष श्रेष्ठ, राम लिम्बु, विकास लिम्बु र आरिफ राउफ पुगेका हुन् ।

शनिबार साँझ भएको अन्तिम प्रतिस्पर्धाको प्रस्तुति र दर्शकको भोटिङको आधारमा राम लिम्बु विजेता भएको कार्यक्रममा आयोजकले घोषणा गरेको थियो ।

विजेता लिम्बुले नगद रु. १२ लाख र गाडी जितेका छन् । योसँगै म्यूजिक नेपालबाट एल्बम निकाल्ने अवसर लगायतका विभिन्न पुरस्कार हात पारेका छन् ।