हामी सबैकाे संसारन्यूज

विकास क्षेत्री अञ्जान
बिजनबारी बजार, भारत

१
नेताले कसम खायो
चुनाव जितेर गएपछि
आफ्नो औकात देखायो।

२
बजारमा दाम बढ्यो
गरिबको चुल्हो नबल्दा
नेताको सान चढ्यो।

३
युवा विदेश गयो
फर्कियो बाकसमा लास
गाउँ रित्तो भयो।

४
जसले चाकडी गर्यो
उसैले पायो पद
इमान्दार त मर्यो।

५
काम पर्दा फकायो
स्वार्थ पूरा भएपछि
उसैले दूर भगायो।

६
कानुन यहाँ बिक्यो
गरिबले न्याय पाएन
अपराधी खुलेआम टिक्यो।

७
भाषणमा देश बचायो
व्यवहारमा लुटेर देशलाई
विदेशी प्रभु रिझायो।

८
पैसाले नाता जोड्यो
सङ्कट आइलाग्दा खेरि
बीचमै साथ तोड्यो।

९
धर्मको नाममा लड्यो
मानवता हरायो यहाँ
पाप झन् बढ्यो।

१०
डिग्री हातमा पर्‍यो
रोजगार नपाएर आखिर
खाडीमा पसिना झर्‍यो।