हामी सबैकाे संसारन्यूज

बिमला चन्द सानू
बैतडी हाल : काठमाडौं

बद्लिन्छ रूप रेखा बद्लिन्छ हाल जस्तै
सोध्दैछ जिन्दगीले हरपल सवाल जस्तै

पालेर एक मीठो दिलमा कसैको आशा
पग्ली रहन्छ माया हरदम हिमाल जस्तै

आँखाले थाम्न खोज्छन् ताराहरूको मण्डल
छल्की रहन्छ जीवन सागरको छाल जस्तै

लेख्दैछ यो कलमले बारुद मसी भएर
जित्दैछ राज्यसत्ता निल्दैछ काल जस्तै

उड्दैछ बाफ बोकी हावा बडो मजाले
झर्दो रहेछ बर्षा आँखाको ताल जस्तै

के झुक्न सक्छ माया स्वार्थीहरूको विचमा
हाँस्यो गुलाफ सानू तोडेर जाल जस्तै

बहर : मुजारे मुसम्मन अखरब
अर्कान : मफ्ऊलु फाइलातुन् मफ्ऊलु फाइलातुन्
वजन : २२१ – २१२२ – २२१ – २१२२