Sansar News
२१ मङ्सिर,लहान । भारतीय बजारबाट अवैध रुपमा नेपाल भित्रियाउन लागेका करिब ४५ हजार मूल्य बराबरको हाँस र कुखुराको चल्ला आज प्रहरीले पक्राउ गरी नष्ट गरेका छन् ।
प्राप्त सूचनाका आधारमा वडा प्रहरी कार्यालय सिरहाबाट खटिएका प्रहरी टोलीले साइकलमा राखेर चोर बाटो हुँदै चल्ला व्यापारीले अवैध रुपमा नेपाल भित्रियाउन लागेका अवस्थामा जिल्लाको बसविट्टाबाट सो परिमाणको हाँस र कुखुराको चल्ला पक्राउ गरेका हुन् । पक्राउ पर्नेमा दुई सय हाँस र चार सय कुखुराका चल्ला रहेको प्रहरीले जनाएको छ ।
प्रहरीलाई देख्ने बित्तिकै चल्ला व्यापारीले चल्लासहितको साइकल छोडेर भागेका थिए । पक्राउ परेका हाँस र कुखुराको चल्लालाई जिल्ला पशु सेवा कार्यालय सिरहाको हातामा खाल्डो खनी नष्ट गरिएको जिल्ला प्रहरी कार्यालय सिरहाले जनाएको छ । रासस
वि.सं.२०७३ मंसिर २१ मंगलवार १३:१७ मा प्रकाशित
