हामी सबैकाे संसारन्यूज

२१ मंसिर । संसदमा दर्ता भएको संविधान संसोधन विरुद्ध विभिन्न राजनीतिक दलहरुले एक हप्ता देखि गर्दै आएको रुपन्देही जिल्ला बन्द फिर्ता लिएका छन् । बन्दको सातौं दिन मंगलबार आन्दोलनरत दलका नेताहरुले संयुक्त विज्ञप्ति निकालेर बन्दको कार्यक्रम फिर्ता लिएको जानकारी दिएका हुन् ।
विज्ञप्तीमा बन्द हड्ताललाई स्थगित गर्दै आन्दोलनको स्वरुप परिवर्तन गरिएको जनाइएको छ । बन्द हड्ताल बाहेक विरोध जुलुस, सभा र बैठकहरु भने जारी राख्ने भनिएको छ । संसदमा दर्ता भएर टेबुल गर्न बाँकी रहेको संसोधन प्रस्ताव सदनमा टेबुल हुने बित्तिकै पुन सशक्त आन्दोलन अघि बढाइने चेतावनी दिँदै उक्त आन्दोलनमा सबैलाई तयारी अवस्थामा रहन अपिल पनि गरिएको छ ।
नेकपा एमाले, नेकपा माले, राष्ट्रिय जनमोर्चा, जनमोर्चा नेपाल, नेकपा मार्क्सवादी र अखण्ड नेपाल पार्टीले सात दिनदेखि जिल्ला बन्द गराउँदै आएका थिए । बन्दका कारण उद्योग, शैक्षिक संस्थाहरु ठप्प भएका छन् भने आम जनताको दैनिकी कष्टकर बन्दै आएको थियो ।