हामी सबैकाे संसारन्यूज

१७ पुस, काठमाडौँ । कामदार छनोटलगायत वैदेशिक रोजगारीमा जान चाहनेले सबै प्रक्रिया अनलाइनबाट पूरा गर्न सक्ने भएका छन्। वैदेशिक रोजगार विभागले जनवरी १ देखि पूर्वस्वीकृति, अन्तिम स्वीकृति, विज्ञापन, कामदार छनोटलगायत सम्पूर्ण प्रक्रिया अनलाइनबाटै सुरु भएको हो ।

नयाँ प्रक्रिया सुरु भएसँगै वैदेशिक रोजगार क्षेत्रका सबै काम कम्युटरमार्फत हुने भएको छ । यद्यपि, यसअघि आइसकेका मागपत्रमा पुरानै प्रणालीबाट हुनेछ । विभागले नयाँ प्रक्रिया सुरु गरेसँगै वैदेशिक रोजगार व्यवसायी उत्साहित भएका छन् ।

नयाँ प्रणालीको झन्झटमुक्त हुने र यसले सबैलाई हित गर्ने व्यवसायी बताउँछन्। विभागले बुधबारदेखि नयाँ मागपत्रको पूर्वस्वीकृति, अन्तिम स्वीकृति अनलाइनबाटै दिन सुरु गरेको छ ।

तर, यसअघि नै प्रक्रियामा रहेका मागपत्र पुरानै प्रक्रियाबाट अघि बढ्ने भएको छ । नयाँ व्यवस्थाअनुसार म्यानपावर व्यवसायीले ल्याएको मागपत्र प्रमाणीकरण गरी सम्बन्धित देशका राजदूतावासले वैदेशिक रोजगार विभागको वैदेशिक रोजगार सूचना व्यवस्थापन प्रणालीमा अपलोड गर्नुपर्छ ।

एकीकृत वैदेशिक रोजगार सूचना व्यवस्थापन प्रणाली सफ्टवेयरमा आधारित अनलाइन प्रणाली हो । यसका लागि विभागले दूतावासलाई अपलोड गर्न मिल्ने व्यवस्था गरेको छ ।

अपलोड गर्नासाथ वैदेशिक रोजगार विभागले पूर्वस्वीकृति दिन्छ । यसअघि म्यानपावर व्यवसायीले सक्कली कागजात बोकेर वैदेशिक रोजगार कार्यालय ताहाचल जानुपर्ने वाध्यता थियो। बुधबार मलेसियन दूतावासले अनलाइनमा म्यानपावर व्यवसायीले ल्याएको मागपत्र अपलोड गरिसकेको छ । बिहीबारको अन्नपूर्ण पोस्ट दैनिकबाट