हामी सबैकाे संसारन्यूज

४ माघ, नेपालगन्ज । नेपाल-भारत सिमाना नजिकैको भारतीय शहर बहराइचको एक होटलमा मृत भेटिएका कोहलपुर-१२ का वडाअध्यक्ष कृष्ण बहादुर खड्काले आत्महत्या गरेको खुलेको छ ।

भारतको बहरराइचस्थित शंकर होटलमा बुधबार दिउँसो मृत भेटिएका वडा अध्यक्ष खड्काको शब नजिकै ‘सुसाइड’ नोट भेटिएको बाँके प्रहरीले जनाएको छ ।

घरमा सुर्खेत जान भनि हिँडेर भारतको बहराइच पुगेका खड्का होटलमा मृत भेटिएपछि जिल्ला प्रहरी कार्यालय बाँकेले अनुसन्धानका क्रममा सुसाइड नोट फेला पारेको थियो ।

खड्काले बैंकको २० लाख बढी ऋण लिएकाले सो चुक्ता गर्ने विषयमा निकै आर्थिक ताव रहेका कारण आत्महत्या गरेको सुसाइड नोटमा खुलेको प्रहरीले जनाएको शनिबारको गोरखापत्र दैनिकमा समाचार छ ।

खड्का आफैले लेखेको बताइएको उक्त सुसाइड नोटमा बैंकका कारण आफू आत्महत्या गर्न बाध्य भएको समेत रहेको प्रहरीले जनाएको छ । उनले तीन महिना अघिपनि आत्महत्या गर्न खोजेको सोहि पत्रमा लेखेका छन् ।