हामी सबैकाे संसारन्यूज

२० फागुन, काठमाण्डौं । अख्तियार दुरुपयोग अनुसन्धान आयोगले पूर्व डिआइजी महेश विक्रमसहित तीजनाविरुद्ध भ्रष्टाचार मुद्दा दायर गरेको छ ।

मध्यक्षेत्रीय प्रहरी तालिम केन्द्र भरतपुरका तालिम समादेशक रहेका महेशविक्रम शाह, लेखापाल प्रहरी सहायक निरीक्षण दिपेन्द्रप्रसाद पनेरु र लेखा सहायक केशव सिंह ऐरीविरुद्ध आज विशेष अदालतमा मुद्दा दायर गरेको हो ।

आयोगका अनुसार उनीहरुले प्रहरी जवानको २०७२ साल माघ र फागुनको तलबभत्ता खर्च लेखी नगद निकाली भ्रष्टाचार गरेको पाइएको छ । उनीहरुले १०३ प्रहरी जवानको दुई महिनाको तलबभत्ता रु ३१ लाख ८८ हजार ४६८ र १४२ जना नयाँ प्रशिक्षार्थी प्रहरी जवानको रु एक लाख ४९ हजार ६१६ गरी कुल रु ३३ लाख ३८ हजार ८४ बराबरको रकम बदनियतसाथ हिनामिना गरी भागबण्डा गरेर लिएको आयोगको अध्ययनबाट खुलेको छ ।
आयोगका प्रवक्ता प्रदीपकुमार कोइरालाका अनुसार उनीहरुविरुद्ध बिगो असुल गरी हदैसम्मको कारबाहीको माग गरिएको छ । आयोगले कोष तथा लेखा नियन्त्रण कार्यालय सिन्धुलीका तत्कालीन लेखापाल सञ्जिव विशुङ्केविरुद्ध पनि सोही प्रकरणमा मुद्दा दायर गरेको छ ।