हामी सबैकाे संसारन्यूज

संसारभरी फैलिएको कोरोना भाइरसका कारण विश्वका धेरै देश त्यसको विरुद्ध लड्न तथा नियन्त्रणका लागि लागि परेका छन् ।
कोरोना भाइरसबाट निम्तने संभावित दुर्घटनाबाट बच्नका लागि बेल्जियम सरकारले नागरिकहरूको स्वास्थ्यलाई ध्यानमा राखेर आजदेखि सख्त सावधानी र सचेतताको लागि देशभर कठोर नियम लागू गरेको छ ।

कर्मभूमिले लागू गरेको कठोर नियम र मातृभूमिमा सरकारको कोरोना भाइरससँग लड्नका लागि व्याप्त तयारी भएको नेदेखेको बताएका लुम्बिनी–कपिलवस्तु दिवस विश्व अभियानका युरोप सल्लाहकार तथा बेल्जियमका अध्यक्ष दामोदरप्रसाद आचार्यले नेपालले पनि सावधानी र सचेतताको लागि निर्णय लिन ढिला नगरोस् भनेका छन् ।

आचार्यले भनेका छन्
कोरोना भाइरसको विश्वव्यापी महामारीका कारण अहिले विश्व नै संकटमा परेको छ । अंग्रेजीमा भनिन्छ “Prevention is better than cure.” यसर्थ, जनतामा कोरोना भाइरसको संक्रमण देखिएका राष्ट्रहरूले थप संक्रमण नफैलियोस भन्ने ध्येयले नागरिकहरूको स्वास्थ्यलाई ध्यानमा राखेर सख्त सावधानी र सचेतताको लागि देशभर कठोर नियम लागू गरेका छन् ।

त्यसैगरि बेल्जियमको राष्ट्रीय सुरक्षा परिषदले पनि आज देखी लागु हुने गरि अप्रिल ३ सम्मका लागि क्याफे, रेष्टुरेन्ट, स्कूल, विश्वविद्यालय र सामूहिक भेला हुने सबै प्रकारका इभेन्टहरू नगर्न राष्ट्रव्यापी निर्देशन जारी गरेको छ । खाद्य पदार्थ बिक्री वितरण गर्ने सुपर मार्केट, औषधि पसल र सार्वजनिक यातायात भने सुचारू रहने जनाइएको छ ।

हिजोसम्म बेल्जियममा ३९९ जनामा संक्रमण देखिएको छ भने ३ जनाले यसबाट जीवन गुमाएको समाचार प्रकाशमा आएको छ ।

तर नेपालमा हालसम्म कोरोना भाइरसको संक्रमणबाट कुनै नेपालीले जीवन गुमाउनु परेको छैन् । यो हाम्रो लागि सुखद समाचार हो । यद्यपि नेपाल सरकारले पनि तत्काल संक्रमण नफैलियोस भन्ने ध्येयले नागरिकहरूको स्वास्थ्यलाई ध्यानमा राखेर यथासिघ्र अन्तरराष्ट्रिय उडानहरूको आवागमन स्थगन गर्दै देशभरका खुला रहेका सिमा नाकाहरू अनिश्चित समयको लागि बन्द गर्दै देशभर सावधानी र सचेतताको लागि उपयुक्त निर्णय लिन ढिला गर्नु हुदैन ।