हामी सबैकाे संसारन्यूज

११ चैत, जर्मनी । संसारभरी महामारीको रुपमा फैलिएको कोरोना भाइरसका कारण सबैले त्रासमय जीवन व्यतित गर्नु परिरहेकोे छ । साथै विश्वका विभिन्न देशमा रहेका नेपाली समुदाय पनि यो भाइरसको चपेटामा परेका छन् ।

अमेरिकामा र बेलायतमा कोरोना भाइरसका कारण दुई सातामा दुईजनाको मृत्यु भएको समाचार प्राप्त भएको छ भने यसको संक्रमणको चपेटामा अहिलेसम्म दर्जन नेपाली परिसकेको बताइएको छ । बहराइनमा तीन, युएईमा २, अष्ट्रेलियामा १, अमेरिकामा २, पोर्चुगलमा एकजना र जर्मनीमा पनि एक नेपाली परिवार संक्रमित भएको समाचार संसारन्युजलाई प्राप्त भएको छ ।

पछिल्लो समाचार अनुसार जर्मनीको राइनल्याण्डस्थित एक शहरमा बसोबास गरिरहेका एक नेपाली परिवार कोरोना भाइरसबाट संक्रमित भएको बताइएको छ ।

यसै विषयमा एनआरएनए जर्मनीका निर्वतमान अध्यक्ष विजय मोक्तानले कोरोना संक्रमण भएको आफूले पनि थाहा पाएको तर पूर्ण विवरण थाहा नभएको बताएका छन् ।

कोरोना संक्रमण भएका दम्पति र उनीहरुका दुई सन्तान रहेको पनि बताइएको छ । संक्रमण भएको पुष्टि भएपछि उनीहरु घरमै क्वारेन्टाइनमा बसेको र आफूहरु निको हुँदै गएकोले चिन्ता नलिन सबै नेपाली समुदायमा अनुरोध गरेको समेत बताइएको छ ।