Sansar News
१३ चैत, बेलायत । युकेमा रहेका प्रशान्त अर्यालको कोरोना भाइरस संक्रमणका कारण मृत्यु भएको पुष्टि भएको छ ।
चितवनको भरतपुर बसेनी निवासी ४० वर्षीय अर्यालको आइतबार राति क्विन एलिजावेथ हस्पिटलमा उपचारका क्रममा मृत्यु भएको थियो ।
यसअघि हृदयघातका कारण मृत्यु भएको समाचार आएपनि उनको मृत्यु कोरोना भाइरस संक्रमणका कारण भएको अस्पतालले बुधबार जानकारी दिएको हो । हाल अर्यालका परिवार पनि क्वारेन्टाइनमा रहेको बताइएको छ ।
बेलायतको साउथ ईस्ट पलमस्टेट बसोवास गर्दै आएका अर्याललाई ब्लडप्रेसर हाइको समस्या पनि रहेको बताईएको छ । तीन हप्ता पहिले नेपाल आएर बेलायत फर्किएका अर्यालको कोरोना संक्रमणका कारण मृत्यु भएको हो ।
अर्यालको असामयिक निधनले बेलायतको नेपाली समाज मर्माहत भएको नेपाली समाज नटिङ्गम युकेका संस्थापक अध्यक्ष रणबहादुर केसीले बताएका छन् ।
केसीले संसारभरी फैलिएको कोरोना भाइरसको महामारीले बेलायतका नेपाली पनि प्रभावित भएको बताउँदै यस परिस्थितिमा सहयोगका लागि नेपाली दूतावास बेलायत, एनआरएनए लगायतका बेलायतका नेपाली संघसंस्थाको सहकार्यमा विभिन्न सहयोग समिति गठन गरिएको समेत जानकारी दिएका छन् ।
स्मरण रहोस्, गत मंगलबार मात्रै बेलायतको साउथ ह्यारोमा बस्दै आएका पूर्व गोर्खा सैनिक ६५ वर्षीय लीला बहादुर राईको पनि मृत्यु भएको थियो । त्यस लगत्तै आइतबार अर्याल र मंगलबार अमेरिकामा रहेका अनिल लिम्बुको पनि भाइरस संक्रमणकै कारण मृत्यु भएको हो ।
यो संगै प्रवासमा कोरोना संक्रमणबाट मृत्यु हुनेको संख्या तीन पुगेको छ भने विभिन्न देशमा रहेका संक्रमित नेपालीको सख्या दर्जन पुगिसकेको छ ।
वि.सं.२०७६ चैत १३ बिहीवार २०:४८ मा प्रकाशित
