हामी सबैकाे संसारन्यूज

महोदय,
म यतिखेर
व्यापार र मूल्य वृद्धिकै
प्रश्न उठाइरहेकी छु

घरघरमा चोक चोकमा छन्,
मान्छे खरिद बिक्रीका पसलहरु

नैतिक लोगो विनाका मान्छेहरु,
गुणस्तर विनाका मान्छेहरु,
रातोदिन अवैध कारोबार चलाइरहेकाछन्

यहाँ सबथोक महङ्गो छ

धर्म,
मानवता,
विद्दत्व,
सिपकला,
के छैन बिक्रीमा
विज्ञापनको पहुँचले ब्यापार चलाइरहेका छन्

मान्छेका पसलहरुमा
मान्छेको मनमानी मूल्य छ
पद पहुँच, प्रशासन महङ्गो छ
मिसावटै मिसावटका मान्छेहरु
मान्छे ब्यापारीका संगठनमा आवद्द छन्

म गुणस्तरीय मान्छेहरुको पसल चाहान्छु

मान्छेले मान्छेको मन र,अङ्ग अङ्गको
कारोबार गर्ने पसलमा
गुणस्तरको प्रश्न उठाउन निषेध छ

कस्ले गर्छ हँ यहाँ अनुगमन ?

मान्छेका कारोवार गर्ने पसलमा
निर्धारित दर भाऊ छैन
ज्ञान, विवेक र मान्छेका स्तरको नाप तौल छैन
महोदय,
मेरो एउटा प्रश्न ?
अब म यहाँ
अभिनयको कारोबार गरुँ कि, वास्तविकताको ?

जीवन यापनको ब्यापार त मैले पनि गर्नै पर्छ

जवाफ चाहान्छु महोदय,
यि मान्छेले, मान्छे बेच्ने ब्यापारमा
म कुन मूल्य निर्धारण गरुँ ?
मायाको कि जालसाजीको ?
म कुन व्यापार गरुँ ?
वैध कि अवैध ?