हामी सबैकाे संसारन्यूज

१५ चैत, इटाली । कोरोना भाइरस (कोभिड–१९) को विश्वव्यापी महामारीको सबैभन्दा बढी चपेटामा परेको देश इटालीमा तीन सयको संख्यामा नयाँ स्वास्थ्यकर्मीको माग गरिएकोमा ८ हजारले दरखास्त दिएका छन् ।

कोरोना भाइरसबाट इटालीमा हालसम्म ४४ जना डाक्टरले विरामीको उपचार गर्दागर्दै मृत्युवरण गरेको र ६ हजार २०५ जना संक्रमित भएको अवस्थामा पनि इटाली सरकारले माग गरेको थप तीनसय नयाँ स्वास्थ्यकर्मीमा ८ हजारले आवेदन दिएर सेवा गर्ने इच्छा देखाएका हुन् ।

ती दरखास्त दिने स्वास्थ्यकर्मीहरुमा ५ हजार भर्खरै पढाइसकेर हातमा डक्टरी सर्टिफिकेट बोकेका छन् । तर, उनीहरुमा कामको राम्रो अनुभव नभए पनि उनीहरु पहिलो लाइनमा उभिएर बिरामीको उपचार गर्नुपर्ने बताइएको छ ।

इटालीमा अहिलेसम्म ४४ जना डाक्टरसहित ९ हजार १३४ जना भन्दा बढीको मृत्यु र ६ हजार भन्दा बढी डाक्टर सहित ८६ हजार २९८ जना भन्दा बढीमा संक्रमण देखिएको भन्दै दुःख व्यक्त गरेका नेपाली समाज रोम इटालीका अध्यक्ष हरिभक्त कराखेतीले चिकित्सकहरुमा यतिधेरै संक्रमित हुनुको कारण सुरुको अवस्थामा उनीहरुले राम्रो सुरक्षा व्यवस्था नपनाएका कारण रहेको बताएका छन् ।

आँखै अगाडि कर्मथलोमा यति भयावह अवस्था देखेका उनले नेपाल सरकारलाई सजगता र सतर्कता अपनाउन ध्यानाकर्षण गराउँदै  यस मामिलामा नेपाल सरकार कहिकतै चुक्न नहुने सुझाव दिएका छन् ।

सामाजिक संजालमा नेपालका बारेमा चिन्ता मिसाउँदै कराखेतीले लेखेका छन, ‘नेपालको स्वास्थ संगठनका बिभाग र अस्पतालहरुको वास्तविक अवस्था कस्तो होला ? यस्तो संबेदनसील बिषयमा नेपाल सरकारले स्वास्थ बिज्ञहरुको समिति गठन गर्न जरुरी छ । राजनीतिज्ञहरुको थुप्रो लागेको समिति बनाउने हैन स्वास्थ्य कुनै पनि लाभ भन्दा पहिले आउँछ । यसका लागि देशको शक्ति, दिमाग, उत्कृष्टता, डाक्टर र वैज्ञानिकहरू एकैठाउँमा सम्मिलित हुनुपर्दछ । नेपाल सरकारको ध्यानाकर्षण होस् ।’