हामी सबैकाे संसारन्यूज

२७ चैत, काठमाण्डौं । नेपाल कम्युनिष्ट पार्टी (नेकपा) को मंगलबार सम्पन्न केन्द्रीय सचिवालय बैठकमा प्रधानमन्त्रीले मिर्गौला प्रत्यारोपणपछि आफू १८ घण्टा सक्रिय रहेपनि त्यसको मूल्यांकन नभएको भन्दै गुनासो गरेका थिए ।

सचिवालय बैठकमा सवालजवाफ हुनुअघि प्रधानमन्त्री तथा अध्यक्ष ओलीले एकघण्टा बोलेको थिए । त्यतिबेला उनले कोभिड १९ महामारी नियन्त्रणका सन्दर्भमा सरकारले गरेको कामको फेहरिस्त सुनाएका थिए । बैठकमा ओलीले मिर्गौला प्रत्यारोपणपछि पनि आफूले एकदमै सक्रियताका साथ काम गरेको बताएका थिए । तर त्यसको मूल्यांकन नभएको भन्दै गुनासो पनि गरेका थिए ।

‘किड्नी ट्रान्सप्लान्ट गरे पनि १८ घण्टा काम गरिएको छ,’ ओलीको भनाई उद्धृत गर्दै श्रोतले भन्यो, ‘हामीले काम गरेकै कारण कोरोना नियन्त्रणमा नेपाल विश्वमै उत्कृष्ठ ठहरिएको छ तर पार्टी भित्रैबाट पनि मूल्यांकन भएन ।’ विहिबार प्रकाशित कान्तिपुर दैनिकमा समाचार छ ।

ओलीले बैठकमा कोभिड १९ नियन्त्रणमा ऐक्यबद्धता जनाउन र नेपाली कामदारको अवस्था बुझ्न कुन–कुन देशका राष्ट्र प्रमुखलाई फोन गरे भन्ने जानकारी गराएका थिए ।

सीमापारि धार्चुलामा बसेका नेपालीले दुःख पाएका विषयमा भने ओलीले त्यो भन्दा धेरै गर्नका लागि सरकारसँग विकल्प नभएको बताएका थिए ।