हामी सबैकाे संसारन्यूज

२७ चैत, काठमाण्डौं । बेलायतको नटिङघमा रहेका नेपाली पूर्वगोर्खा सैनिकको मृत्यु भएको छ ।
रुघाखोकी, ज्वरो लगायतका कोरोना भाइरस संक्रमणका लक्षण देखिएपछि जिपीको सल्लाहमा घरमै आइसोलेसनमा बसेका सोलुका शिव श्रेष्ठको बुधबार (अप्रिल ८) मा मृत्यु भएको बताइएको छ ।

५८ वर्षीय उनी घरमै आइसोलेसनमा बसेका बेला स्वास्थ्यमा थप समस्या आएपछि बुधबार बिहान अस्पताल भर्ना गरिएको थियो । उनलाई कोरोना संक्रमणको आशंकमा उपचार गरिएपनि आज (विहिबार) मात्र त्यस सम्बन्धी रिर्पोट आउने परिवारले जनाएको बताइएको छ । उनको मृत्यु हृदयघातका कारण भएको हुनसक्ने आशंका समेत गरिएको छ ।

नेपाली समाज नोटिङघमका संस्थापक सदस्य समेत रहेका श्रेष्ठ श्रीमती र दुई छोरासँग बेलातयमा बस्दै आएका थिए ।
श्रेष्ठको मृत्युको खबरले नोटिङघम नेपाली समाज मात्र नभएर बेलायतमा रहेका सिंगो नेपाली समुदाय मर्माहत भएको समाजका संस्थापक अध्यक्ष रण केसीले संसारन्युजसँग दुःख व्यक्त गरेका छन् ।

त्यस्तै मंगलबार साँझ (७ अप्रिल) मा मात्रै बेलायतको अल्पर्टनमा बस्दै आएका पर्वतका चेत प्रसाद गुरुङको कोरोना संक्रमणका कारण मृत्यु भएको थियो ।

पर्वतको पैंयुखोला घर भई तमु धिं लन्डनका वरिष्ठ उपाध्यक्ष समेत रहेका समाजसेवी ५९ वर्षीय गुरुङ १४ दिनदेखि कोरोना संक्रमणले थलिएको बताइएको छ । उनको ह्यारोस्थित नर्थविक पार्क अस्प्तालमा उपचारकै क्रममा मृत्यु भएको बताइएको छ ।

स्मरण रहोस् बेलायतमा यसभन्दा अघि पनि कोरोना संक्रमणका कारण ६५ वर्षीय भूपु गोर्खा लिला बहादुर राईको पनि मृत्यु भएको थियो । उनी कोरोना संक्रमणका कारण बेलायतमा ज्यान गुमाउन पहिलो नेपाली हुन् ।

त्यस्तै इस्ट लन्डनमा बसोबास गर्ने चितवनका ४० वर्षीय प्रशान्त अर्यालको पनि कोरोना संक्रमणकै कारण मृत्यु भएको हो । पहिले हृदयघातका कारण उनको मृत्यु भएको भनिए पनि पछि अस्पतालले उनमा कोरोना संक्रमणका कारण मृत्यु भएको पुष्टि गरेको थियो ।

बेलायतमा हालसम्म कोरोना संक्रमणका कारण तीन नेपालीको मृत्यु भएको छ । ती तीनैजना भुतपुर्व गोर्खा सैनिक रहेको बताइएको छ । बुधबार मृत्यु हुने श्रेष्ठ पनि कोरोना संक्रमणको लक्षण आइसोलेसनमा देखिएपछि आइसोलेसनमा बस्दै आएका थिए । यद्यपी उनमा कोरोना संक्रमण भएको पुष्टि भइसकेको छैन ।

बेलायतमा फेरि एक नेपालीको मृत्यु, जसले सचेतना बाँड्दै आयो उसैलाई लग्यो कोरोनाले