हामी सबैकाे संसारन्यूज

९ अप्रिल । बेलायतमा फेरि एक नेपालीले कोरोना भाइरसका कारण ज्यान गुमाएका छन् ।

‘कोरोना भाइरसबाट सचेत रहुँ’ भन्दै सबैलाई सजग रहन आग्रह समेत गरेर केही दिन अघि स्टाटससमेत लेखेका पर्वत स्थायी घर भै हाल बेलायतको अल्पर्टनमा बस्दै आएका चेत प्रसाद गुरुङको कोरोनाकै कारण ज्यान गएको छ ।  तमु धीं लन्डन इकाईका वरिष्ठ उपाध्यक्ष समेत रहेका गुरुङको बुधबार राती निधन भएको बताइएको छ ।

उनले सचेतना फैलाउने क्रममा ‘यो भाइरस लाग्ने सबैको मृत्यु हुन्छ भन्ने भ्रम नपरौं किनकी धेरै जनालाई पोजेटिभ भएपनी निको भएका अनेकौं खुशीका खबरहरु आएका छन। इम्युनिटी पावर बढाउनुहोस, भिडभाडमा नजानुहोस साथै मास्क र सेनिटाईजर प्रयोग गर्नुहोस। कोरोना भाईरस सम्बन्धी अत्यन्तै महत्वपूर्ण यो भिडियो सामाग्रीलाई हेरी जनचेतनाको लागि सक्दो शेयर गरि मद्दत गर्नुहोला ।आफू पनि बचौं र अरुलाई पनि बचाऔं ।’ भन्दै सन्देश समाजिक सञ्जालमार्फत सम्प्रेषण गरेका थिए ।

गैरआवासीय नेपाली संघका पूर्व उपाध्यक्ष कुल आचार्यले गुरुङको कोरोनाका कारण निधन भएको खबरले स्तब्ध भएको भन्दै गुरुङप्रति श्रद्धाञ्जली व्यक्त गरेका छन् ।

उनी भन्छन् ‘तमु धीं लन्डन इकाईका वरिष्ठ उपाध्यक्ष मिलनसार, समाजसेवी, मर्दापर्दा जहिले पनि सक्दो सहयोग गर्न तत्पर, हँसमुख चेत दाजुलाई अब उप्रान्त भेट्न न पाइने भयो भन्ने सोच्दा पनि विश्वास लागिरहेको छैन। दुखको यो घडीमा म स्वर्गीय दाजुको आत्माको चिर शान्तिको कामना गर्दछु।’

उनले परिवारप्रति पनि समवेदना व्यक्त गर्दै भनेका छन् ‘आदरणीय भाउजु लगायत शोक सन्तप्त सम्पूर्ण परिवारप्रति हार्दिक समवेदना व्यक्त गर्दछु। दाजु, तपाईं हाम्रो सम्झनामा संधै रहीरहनु हुनेछ ।’

बेलायतमै यसअघि एक नेपालीको कोरोनाका कारण मृत्यु भएको थियो ।