हामी सबैकाे संसारन्यूज

२८ चैत्र, काठमाडौं । कोरोना भाईरस (कोभिड १९) बाट साउदी अरबको शाही परिवारका १५० जना भन्दा संक्रमित भएका छन् ।

अल जजीरा तथा न्युयोर्क पोष्टले दिएको जानकारी अनुसार साउदी राजपरिवारका १५० भन्दा बढीमा कोरोना भाइरसको संक्रमण देखिएको हो । यसले राजपरिवारमा त्रास सिर्जना गरेको बताइएको छ ।

साउदीको राजपरिवारमा संक्रमण देखिएसंगै ८४ बर्षीय राजा सलमानलाई जेद्धा शहरमा क्वारिन्टाइनमा राखिएको छ भने ३४ वर्षीय राजकुमार मोहम्मद बिन सलमान र उनका मन्त्रीहरुलाई पनि लाल सागर किनारमा तयार पारिएको क्वारेन्टिनमा राखिएको छ ।

राजा सलमानका भतिजा प्रिन्स फैसल बिन बन्दर बिन अब्दुलाजीज अल सउद गम्भीर अवस्थामा उपचार भैरहेको जनाइएको छ । उनी ७० वर्षको रहेको र रियादको रियादको गभर्नर समेत हुन् ।

युरोप यात्राको क्रममा साउदी राजकुमारहरूमार्फत उक्त रोग सल्केको अनुमान गरिएको छ । संचारमाध्यमका अनुसार बिहीबार यमनमा युद्धविराम घोषणा गर्ने निर्णयले स्वास्थ्य विपत्तिमा सकरात्मक भूमिका खेल्ने विश्वास साउदी सरकारले लिएको छ । साउदी सरकारले बिहिबारदेखि लागू हुने गरी यमनले जस्तै दुई हप्ताका लागि लकडाउन घोषणा गरेको छ ।

राजपरिवारको उपचारमा किंग फैसल स्पेशलिस्ट अस्पतालका डाक्टरहरु संलग्न भएको बताइएको छ । राजपरिवार, उनीहरुका नजिकका मानिसहरू र उच्च व्यक्तित्वहरुका लागि ५०० वेडको विशेष अस्पताल तयारी अवस्थामा राखिएको जनाइएको छ ।

आउँदो केही हप्ता साउदीका लागि कठिन हुने अध्ययनको पूर्वानुमान रहेको बताइएको छ । साउदी प्रेस एजेन्सीले आउँदो हप्ता संक्रमणको संख्या कम्तिमा १०,००० देखि अधिकतम २००,००० सम्म हुने अनुमान गरेको छ ।  साउदी शाही परिवार भित्र १५ हजार सदस्य रहेको बताइन्छ ।
साउदी अरबमा कोरोनाका कारण बिहिबारसम्म ४४ जनाको मृत्यु भएको र २ हजार ७ सय ९५ जना संक्रमित रहेको जनाइएको छ ।