Sansar News
२८ चैत, कुवेत । कुवेतमा कार्यरत दुई नेपालीको मृत्यु भएको छ । कुवेतमा कार्यरत लम्जुङका ४१ वर्षीय आइत बहादुर तामाङ र नुवाकोटकी सोनी तामाङको मृत्यु भएको हो ।
नेपाली दूतावासका द्धितीय सचिव श्री कृष्ण सिलवालले दिएको जानकारी अनुसार अल्गानियम कम्पनीको आइत बहादुर तामाङले आत्महत्या गरेको प्रारम्भिक अनुसन्धानमा खुलेको छ ।
राहदानी नम्बर ०७२२४७२४ का तामाङसँगै रहने साथीका अनुसार नेपाल फर्कने तयारीमा रहेका तामाङ लकडाउनका कारण रोकिएका थिए । उनले अप्रिल ८ बुधबारका दिन कम्पनीकै बिल्डिङमा झुण्डिएर आत्महत्या गरेको कुवेतबाट सञ्चालित अनलाइन तितोपाटीले लेखेको छ ।
त्यसैगरी कुवेतमै नुवाकोटकी सोनी तामाङको उपचारका क्रममा मृत्यु भएको छ । नुवाकोट मेगाङ गाउँपालिका ४ किस्पाङकी ३७ वर्षीया तामाङ ४ महिना अघिमात्र कुवेत पुगेकी थिइन् ।
कुवेतको इकोभर्ट एफएम क्लिनिङ कम्पनीमा काम गर्ने उनको स्वास्थ्यमा समस्या आएपछि सुयेख क्यान्सर अस्पताल पुर्याइएको थियो । उनको उपचारकै क्रममा बिहिबार (९ अप्रिल) मा मृत्यु भएको थियो ।
एक महिना अघि कुवेतको फर्वानिया अस्पतालमा पुर्याएकी उनमा रक्त क्यान्सर भएको पत्ता लागेपछि सुयेख क्यान्सर अस्पतालमा पुर्याएको थियो । त्यहि उनको मृत्यु भएको हो ।
कुवेतस्थित नेपाली दूतावासले अस्पताल र सम्बन्धीत निकाय तथा कम्पनी अनि परिवारसँग सम्पर्क तथा कुराकानी गरिसकेको र आवस्यक प्रक्रिया अघि बढाउने जनाएको छ ।
मृतकको घरमा श्रीमान बाल सिंह तामाङ, एकछोरी र एक छोरा रहेको बताइएको छ ।
वि.सं.२०७६ चैत २८ शुक्रवार १२:५८ मा प्रकाशित
