Sansar News
३ बैशाख, अमेरिका । अमेरिकामा रहेका नेपालीहरुका अभिभावक तथा सामाजिक अभियन्ता प्रा.डा विष्णु पौडेलको निधन भएको छ ।
अमेरिकामा रहेका सवै नेपालीका लागि प्रेरक व्यक्तित्व तथा बिद्धान पौडेलको ८९ बर्षको उमेरमा बुधबार (अप्रिल १५) निधन भएको हो ।
५० बर्ष भन्दा अगाडि अमेरिका आएका प्रा.डा. पौडेल अत्यन्तै क्रियाशील र सक्रिय थिए । नेपाली समुदायमा सामाजिक अभियन्ताका रुपमा परिचित रहेका प्रा.डा. पौडेलले नेपाली लगायत विभिन्न एसियन अमेरिकन संघसंस्थामा नेतृत्वदायी भूमिका निर्वाह समेत गरेका थिए ।
स्व. पौडेल अंग्रेजी, संस्कृत, नेपाली, हिन्दी लगायत अन्य केही स्थानीय भाषाका ज्ञाता रहेका थिए । पौडेलले साउथ एशिया क्षेत्रको नीति अध्ययनमा ह्वाइट हाउसलाई परामर्श दिने टोलीलाई दुई कार्यकाल नेतृत्व समेत गरेका थिए । उनी नेपाल शिक्षा तथा सांस्कृति केन्द्र (एनईसीसी) को बोर्ड अफ ट्रस्टी (गुठी सदस्य) पनि रहेका थिए ।
उनले भर्जिनियाको फेयरफ्याक्स स्थित चर्चित दुर्गा मन्दिरको संचालन समितिमा दुई कार्यकालसम्म नेतृत्व गरेका थिए ।
नेपालवाट धेरै पहिले अमेरिका आउनेमध्येका एक स्व. पौडेललाई समुदायले सदैव एक बौद्धिक व्यक्तित्वको रुपमा हेर्ने गथ्यो । तार्किक शक्ति, प्रवचन, ज्ञानगुनका कुरामा निकै गहिरो ज्ञान राख्ने पौडेलको निधनले नेपाली समुदायलाई अपूरणीय क्षति भएको छ र समाजले एक सामाजिक अभियन्ता गुमाएको छ ।
वि.सं.२०७७ वैशाख ३ बुधवार ०८:३८ मा प्रकाशित
