Sansar News
३ बैशाख, काठमाण्डौं । कोभिड १९ को कोरोना आक्रमणले संसारको अर्थतन्त्रमा नै ठूलो धक्का पुर्याइरहेको र नेपाली अर्थतन्त्रको पुनसंरचनाकै बहस चलेको बेला किसानहरुले भन्न थालेका छन् ‘अबदेखि खेति किन गने ?’
उत्पादन नभै आत्मनिर्भर नहुने र आत्मनिर्भर नभै स्वाधीन अर्थतन्त्र नहुने अनि स्वाधीन अर्थतन्त्र नभै पुँजीको न्यायिक वितरण नुहने तथा पुँजीको न्यायिक वितरण विना समाजवादको जग नै नबस्ने अर्थात् राजनैतिक भाषण र आश्वासन केवल नारामात्र बनिरहेको कुरो बुझेरै उत्पादन अभियानमा लागेका एक राजनैतिक व्यक्तिले संजाल मार्फत् व्यक्त गरेको प्रतिक्रियाले सबैको ध्यान तानेको छ ।
दूध सडकमा पोख्नु परेको, केरा गाड्नु परेको, अण्डा र कुखुरा पुर्नुपरेको जस्ता घटनासहित कृषकहरुले केही सकारात्मक र नकारात्मक प्रतिक्रिया दिइरहेका थिए । तर, व्यवसायिक रुपले तरकारी खेति गरेका विकेश श्रेष्ठले सडकमा फालेको फोटो हालेका छैनन् । आशा र विश्वासलाई भरीलो र जग्गालाई मलिलो बनाएका उनले नुवाकोटको फाँटमा काक्रो, काउली, ब्रोकाउली र बन्दागोभी फलाएका छन् । उत्पादन गरेको वारीमा सडाउनु हुँदै होइन तर उनले विक्रिका लागि गरेको प्रयास अर्थहिन भएको भन्दै पीडादायी प्रतिक्रिया दिएका छन् ।
उनले सामाजिक संजाल फेसबुकमा भनेका छन् ‘पहिलो दिन काउली र ब्रोकाउली बट्टार बिदुर त्रिशुली घुमाइयो दुई डोका घुमाइयो बिक्री भयो ५५० रको १ बाँकी फर्काइयो सुकुटि भेज बनाइयो । दोस्रो पटक काँक्रो र ब्रोकाउली एक डोको ४० किलो पठाइयो रुपैया आयो ८५० र तेस्रोपटक फेरि काउली ब्रोकाउली बजार घुमाइयो रुपैया आयो ५५० र बाँकी बजार मै बाँडियो छोडियो । काँक्रो काउली ब्रोकाउली र बन्दा कोभी २० रोपनी छ ! लगानी त गयो गयो तरकारी खेती अब देखी नगर्ने मन भयो ।’
चालिसको दशकदेखि वर्गियमुक्ति आन्दोलनमा उत्प्रेरित हुँदै जनयुद्धको समयमा राजनैतिक र फौजी कमाण्ड सम्हालेका र शान्ति प्रक्रियापछि पुष्पकमल दाहाल ‘प्रचण्ड’ को प्रमुख प्रमुख स्वकीय सचिव समेत भएका विकेश श्रेष्ठले उत्पादन र समाजवादको सम्बन्ध सिधा रहेको बताउँदै उत्पादनमा लागेका थिए ।
एकातिर उनीजस्ता सचेत कृषकको हालत यो अवस्थामा छ भने अर्कातिर उत्पादन नगरी देश नधानिने भएको छ । नेपालमै रहेकाको पेट पाल्नदेखि खाडी लगायत विभिन्न ठाउँबाट फर्कने नेपालीलाई समेत यहि माटोले हातमुख जोडाउनु छ । समाजवादी कृषिमन्त्री र आशावादी प्रधानमन्त्रीले निर्देशिका मात्र बनाउने कि किसानको आशु पुछ्ने ?
वि.सं.२०७७ वैशाख ३ बुधवार १७:०२ मा प्रकाशित
