हामी सबैकाे संसारन्यूज

१२ वैशाख, काठमाडौँ । बेलायतले कोरोना भाइरस भ्याक्सिनको पहिलो पटक मानवमा परीक्षण गरेको छ । वृटिश सरकारको अक्सफोर्ड विश्वविद्यालयले बुधबार कोरोना भाइरसविरुद्धको खोप दुई व्यक्तिमा परीक्षण गरेको हो ।

परीक्षणका रुपमा दुई स्वयम्सेवकमा यो भ्याक्सिन लगाइएको थियो भने अध्ययनका लागि ८ सय भन्दा बढीलाई तयारी अवस्थामा राखिएको जनाइएको छ ।

विश्वविद्यालयले एक सम्भावित कोरोना भाइरसको भ्याक्सिन मानव परीक्षण सुरु गरेको हो, जसले एक वर्षभित्र नागरिकका लागि उपलब्ध गराउने लक्ष्य राखेको छ ।

बेलायती स्वास्थ्य मन्त्री मैट हैनकका अनुसार यो भ्यासिन परियोजनालाई बेलायती सरकारले पूर्ण सहयोग गरेको छ । यो भ्यासिन योजना Jenner Institute and Oxford Vaccine Group को संयुक्त पहलमा चल्ने बताइएको छ । यसका लागि बेलायत सरकारले २० करोड पाउण्ड सहयोग गर्ने योजना सुनाएको छ ।

यो भ्याक्सिन सुरुमा स्वस्थ युवाहरुमा प्रयोग गरिने छ त्यसपश्चातमात्र अरु उमेरका मानिसहरुमा प्रयोग हुने बताइएको छ । गर्भवती तथा स्तनपान गराउने महिलामा भने यो खोप नलगाइने जनाइएको छ ।

अक्सफोर्ड विश्वविद्यालयका प्रोफेसर प्रोफेसर सारा गिल्बर्टको टिमले ८० प्रतिशत सफलताको अपेक्षा गरेको छ । अर्का प्रोफेसर Andrew Pollard का अनुसार यदि परीक्षण सफल भएमा सेप्टेम्बरसम्म लाखौँ भ्याक्सिनहरु बन्नेछन् ।

यद्यपी विश्व स्वास्थ्य संगठन तथा ब्रिटेनका प्रमुख वैज्ञानिक सल्लाहकार सर पेट्रिक वालेसले भने कोभिड १९ विरुद्धको भ्याक्सिन पत्ता लगाउन १२ देखि १८ महिनासम्म लाग्ने कुरा पटक पटक भन्ने गरेका छन् ।

यसखालको परीक्षण यसअघि चीन तथा अमेरिकामा पनि चलिरहेको छ भने जर्मनले पनि यहि महिनाको अन्ततिर शुरु गर्दैछ । त्यसका लागि जर्मनीको संघीय भ्याक्सिन प्राधिकरणले अनुमति दिएको छ । (एजेन्सी)