हामी सबैकाे संसारन्यूज

भनिन्छ मानव एक चेतनशिल प्राणी हो र भगवानले मानवलाई उच्च श्रेणीमा राखी ज्ञान, प्रविधि र सीपले भरिपूर्ण बनाउन धेरै ज्ञान आर्जन गर्न सक्ने बनाउनुभएको छ । तर, विधिको विडम्वना भनौ वा पैसा र पावरको दौड, चेतनशील प्राणी सबैभन्दा अचेतनशील र अमर्यादित बन्दै गएको छ ।

शक्तिशाली देशले कमजोर देशलाई हेप्ने र धावा बोल्ने, धनी र बलिया बाङ्गाहरुले निर्धन र कमजोर मानिसहरुलाई बलीको बाख्रो बनाउने होडबाजीले गर्दा आज धेरै अस्त्र, शस्त्र, आणविक हात हतियार र प्रकृति र पृथ्वीविरुद्ध अप्राकृतिक संयन्त्र प्रयोग गर्ने मानव दानवको ताण्डवमा नाचिरहेको छ र आफू सर्वशक्तिमान भएको खोक्रो आडम्बरी पन दर्शाइरहेको छ ।

सूर्यले आफ्नो गति र तापलाई निरन्तर राख्नुभएको छ । हावापानी सदा झै आफ्नै गतिमा चलिरहेका छन् । पृथ्वीमा बिनासकारी मानवहरु आफ्नै घरको झ्यालखानमा थुनिएर बसेको परिप्रेक्ष्यमा वातावरणिय बिनास क्रमिक रुपमा कम भएको छ । चराचुरुङ्गीहरु स्वच्छ वातावरणमा रमाइरहेका छन् । बन्यजन्तुहरु आफ्नो पौष्टिक आहार ब्यहारपछि चैनको नीद सुतिरहेका छन् । जलमा बस्ने माछा र अन्य जन्तुहरु रमाउदै आफ्नै संसारमा नतमस्तक छन् । त्यसैले हेर्दा लाग्छ पृथ्वीमा भएको केही भार पीडा अलि मत्थर भएको छ, मानौ यी मानवहरुलाई भगवानले चेतावनीसमेत दिइरहेका छन् । मानव तिमी सुध्र अब त दानवरुपी क्रियाकलापलाई रोकेर सत्कर्ममा आउ अनि मात्रै तिमिले शान्तिको श्वास फेर्न सक्ने छौ ।

हुन पनि सानो जीवाणुले विश्वलाई हल्लाएको छ । साना ठूला क्षेप्यास्त्रहरुमा खिया लागिसकेको छ । शक्तिशाली देशहरुको शक्ति पनि क्षीण भएको अवस्था छ । शाषक होस् वा रैती, धनी होस् वा गरीव, वृद्ध होस वा तन्नेरी सबैलाई हसोहवास उडाएको छ अनि सबैलाई एकै डुङ्गामा ल्याएर थुपारिदिएको छ ।

त्यसैले त आज कोरोनाको डर र त्राशमा पृथ्वीमा भएका जलचर, थलचर अनि प्रकृतिका सम्बाहक सुर्य,चन्द्र,पृथ्वी ,पशुपंक्षी,बनस्पति सबै यथावत आफ्नै गतिमा छन् तर चलाक र बुद्धिजीवी मानव पिजराको सुगाजस्तो घरमै बन्दी भएर बसेको छ । अब मानव जीवनको पद्धतिमा प्रकृतिको विनास गरेर होईन प्रकृति प्रेमी भएर दया माया र सहानुभूतिका साथ अघि बढ्ने प्रेरणा दिने कि ???