Sansar News
११ जेठ, काठमाण्डौं । बाँकेको नरैनापुर गाउँपालिकामा कोरोना संक्रमण नियन्त्रणमा आउन नसकेपछि सेना परिचालन गरिने भएको छ ।
जिल्ला सुरक्षा समितिको आज बसेको बैठकले अर्को सूचना जारी नभएसम्मका लागि आजै राति ८ बजेदेखि गाउँपालिकामा निशेषधाज्ञा जारी गरेको छ ।
जिल्ला प्रशासन कार्यालय बाँकेका अनुसार गाउँपालिकामा नेपाली सेना, नेपाल प्रहरी र सशस्त्र प्रहरी परिचालन गरिने छ । लकडाउन प्रभावकारी बनाउन, चिकित्सक तथा स्वास्थ्यकर्मीहरुका लागि सहजरुपमा कामगर्ने वातावरण बनाउन तथा शान्ति सुरक्षाका लागि यस्तो निर्णय गरिएको जनाइएको छ ।
बैठकले नैरनापुरमा थप चिकित्सक तथा स्वास्थ्यकर्मी परिचालन गरिने निर्णय समेत गरेको छ ।
नरैनापुरमा पछिल्लो समय कोरोना संक्रमित देखिएकालाई आइसोलेसमालैजान नदिने, संक्रमितलाई भगाउने, चिकित्सक तथा स्वास्थ्यकर्मीलाई असहयोग गर्नेलगायतका कामहरु स्थानीयबाटै हुन थालेपछि संक्रमणको स्थिति नियन्त्रणबाट बाहिर जान थालेको भन्दै गाउँपालिकाले संघीय सरकार र प्रदेश सरकारसँग सहयोग मागेका थियो ।
नरैनापुरमा कोरोना संक्रमणको भयावह हुने स्थिति देखिएपछि बाँके प्रशासनमार्फत् प्रदेश सरकार र संघीय सरकारसँग स्थिति नियन्त्रणका लागि सहयोग मागिएको गाउँपालिकाका अध्यक्ष इस्तियाक अहमद शाहले बताए ।
स्वास्थ्यमन्त्रालयले जानकारी गराएको पछिल्लो तथ्यांक अनुसार नरैनापुरमा मात्र हालसम्म ११४ जनामा कोरोना सङक्रमण देखिएको छ । तीमध्ये २५ वर्षीय युवाको क्वारेन्टाइनमै मृत्यु भएको थियो ।
हलसम्म बाँकेमा कोरोना संक्रमितको संख्या १४२ पुगेको छ ।
वि.सं.२०७७ जेठ ११ आइतवार २०:१५ मा प्रकाशित
