Sansar News
१७ जेठ, काठमाण्डौं । नेपालमा शनिबार (१७ जेठसम्म) र्यापिड र पिसीआर प्रविधि दुवैबाट १ लाख ६७ हजार ४८४ वटा कोरोनाको नमुना परीक्षण गरिएको छ । जसमा पछिल्लो २४ घण्टामा दुवै प्रविधिबाट ४,१५२ वटा नमुना परीक्षण गरिएको स्वास्थ्य तथा जनसंख्या मन्त्रालयले जानकारी दिएको छ । यो शुक्रबारको तुलनामा झण्डै २ हजारले कमि हो ।
मन्त्रालयका अनुसार आजसम्म पिसीआर प्रविधिबाट ६६ हजार ७२९ र आरडिटी प्रविधिबाट १ लाख ७ हजार ५५ वटा नमुना परीक्षण गरिएको हो । जसमा पछिल्लो २४ घण्टामा २,५७८ पिसीआर र १,५७७ र्यापिड परीक्षण गरिएको छ ।
प्रदेश परीक्षण विवरण
त्यसैगरी प्रदेश नं १ मा ११,७४७ प्रदेश नं २ मा ६,८१८, बाग्मती प्रदेशमा २५,२३१ गण्डकी प्रदेशमा ८,४५८ प्रदेश नं ५ मा २०,१८५ कर्णाली प्रदेशमा १२,९९९ र सुदूरपश्चिम प्रदेशमा २१,६१७ वटा नमुना आरडिटी प्रविधिबाट परीक्षण गरिएको हो ।
क्वारेन्टाइनमा रहनेको संख्या
हाल सातै प्रदेशमा विभिन्न क्वारेन्टाइनमा १ लाख १० हजार ७८ जना रहेका छन् । जसमा प्रदेश नं १ मा ३,१६६, प्रदेश नं २ मा १८,९७१ बाग्मती प्रदेशमा २,२२३ गण्डकी प्रदेशमा ३,०२६, प्रदेश नं ५ मा ३३,४५१, कर्णाली प्रदेशमा १८,९३६ र सुदूरपश्चिम प्रदेशमा ३०,३१० जना रहेको स्वास्थ्य मन्त्रालयले शनिबार (जेठ १७ गते) को नियमित पत्रकार सम्मेलनमा जानकारी दिएको हो ।
आइसोलेसन र रेडजोनमा
हालसम्म ७ प्रदेशका ५३ जिल्लाका विभिन्न अस्पतालमा १,१७६ जना आइसोलेसनमा रहेका छन् । जसमा प्रदेश १ मा १३०, प्रदेश २ मा ४४२, बाग्मती प्रदेशमा १५, गण्डकी प्रदेशमा १७, प्रदेश नं ५ मा ४९६, कर्णाली प्रदेशमा ६१ र सुदूरपश्चिम प्रदेशमा १५ जना रहेका छन् । उनीहरुको अवस्था सामान्य रहेको बताइएको छ ।
त्यसैगरी हालसम्म रेडजोन (संभावित संक्रमित) मा रहनेको संख्या ४७४ पुगेको छ । पछिल्लो २४ घण्टामा १ जना रेडजोनमा थपिएका छन् । उनी महोत्तरी निवासी हुन् । हालसम्म रेडजोनमा ४७४ जना देखिएपनि उनीहरुमा हालसम्म संक्रमण नदेखिएको पनि स्वास्थ्य मन्त्रालयले जनाएको छ ।
आज १८९ जनामा कोरोना संक्रमण, संक्रमितको संख्या १४०१ पुग्यो
नेपालमा आज थप १८९ जना नयाँ कोरोना संक्रमित भेटिएका छन् । स्वास्थ्य मन्त्रालयका अनुसार संक्रमित हुनेमा पुरुष १८५ पुरुष र महिला ४ जना रहेका छन् ।
मन्त्रालयका अनुसार राष्ट्रिय जनस्वास्थ्य प्रयोगशाला टेकुमा गरिएको परीक्षणमा १२४ जनामा पोजेटिभ देखिएको छ । उनीहरु धनुषाका ७ जना २० देखि ४२ वर्षीय पुरुष, झापाका ४५ वर्षीय पुरुष, कपिलवस्तुका ७७ जना १६ देखि ६० वर्षीय पुरुष, ललितपुरका २३ वर्षीय महिला, महोत्तरीका २५ देखि ५५ वर्षीय ४ पुरुष र रौतहटका १८ देखि ४५ वर्षका ६ जना पुरुषमा संक्रमण पुष्टि भएको हो । साथै सर्लाहीका १६ देखि ४० वर्षका १७ जना पुरुष र सिराहाका १७ देखि ४० वर्षीय ११ जना पुरुष पनि संक्रमित भएका छन् ।
प्रादेशिक अस्पताल रुपन्देहीमा गरिएको परीक्षणमा २६ जनामा संक्रमण पुष्टि भएको छ । उनीहरुमा कपिलवस्तु यशोधराका २९ जना रहेका छन् । उनीहरु १५ देखि ५० वर्षीय पुरुष रहेका छन् ।
बीपी कोइराला स्वास्थ्य विज्ञान प्रतिष्ठानमा गरिएको परक्षिणमा सप्तरीका ९ जनामा संक्रमण देखिएको छ । उनीहरुमा ८ जना पुरुष र एक महिला रहेका छन् । उनीहरुको उमेर समुह १८ देखि २८ वर्ष रहेको छ ।
राप्ती स्वास्थ्य विज्ञान प्रतिष्ठान दाङमा गरिएको परीक्षणमा दाङका ८ जनामा संक्रमण पुष्टि भएको छ । उनीहरुमा कपिलवस्तु विजनयगरका ३ जना २६ देखि ५२ वर्षीय पुरुष, हापुरे दाङका ३० वर्षीय पुरुष र बग्लाचुली दाङका २७ देखि ३८ वर्षका पुरुष तीन पुरुष २८ वर्षीय महिला पनि रहेकी छन् ।
नारायणी अस्पताल वीरगन्जमा गरिएको परीक्षणमा बारा हर्दियाका २८ वर्षीय पुरुष, पर्सा प्रसौनीका १८ वर्षे पुरुष र ६० वर्षीया महिलामा पनि संक्रमण देखिएको छ ।
त्यसैगरी कर्णाली स्वास्थ्य विज्ञान प्रतिष्ठानमा गरिएको परीक्षणमा दैलेखका १४ जनामा संक्रमण भेटिएको छ । उनीहरु १४ देखि ५० वर्षका पुरुष रहेका छन् ।
कोशी प्रादेशिक अस्पताल विराटनगरमा गरिएको परीक्षणमा संखुवासभा खादवारीका २३ वर्षे र पाँचखपनका २२ वर्षीय पुरुषमा पनि संक्रमण भेटिएको छ ।
आज थपिएका १८९ जनासँगै नेपालमा कोरोना संक्रमितको संख्या १४०१ पुगेको छ । उनीहरुमा १,२८८ जना पुरुष र ११३ जना महिला रहेको पनि मन्त्रालयले जानकारी दिएको छ ।
कुन प्रदेशमा कति संक्रमित ?
स्वास्थ्य मन्त्रालयका अनुसार आजसम्म संक्रमित व्यक्ति भेटिएका मध्ये प्रदेश १ का ९ जिल्लाका १६० जना, (आज थपिएको जिल्ला संखुवासभा), प्रदेश २ का सबै जिल्ला (८ जिल्ला) का ५४७ जना, बाग्मती प्रदेशका १२ जिल्लाका ४५ जना, गण्डकी प्रदेशका ५ जिल्लाका २० जना, प्रदेश नं ५ का ९ जिल्लाका ५४७, कर्णाली प्रदेशका ३ जिल्लाका ६१ जना र सुदूरपश्चिम प्रदेशका ७ जिल्लाका २१ जना रहेका छन् । कूल १४०१ जना संक्रमित भएको पुष्टि भएको छ भने ५३ जिल्लाका मानिसहरुमा संक्रमण पुष्टि भएको छ ।
आज १३ जना कोरोना संक्रमणबाट मुक्त, निको हुनेको संख्या २१९ पुग्यो
पछिल्लो २४ घण्टामा १३ जना कोरोना भाइरस संक्रमणबाट मुक्त भएर घर फर्किएका छन् । उनीहरुमा टेकु अस्पतालमा उपचाररत बुढानिलकण्ठका ३० वर्षीय पुरुष जो पाँचदिनको अस्पताल बसाईपछि घर फर्किएका हुन् भने टोखा ७ का ४० वर्षीय पुरुष पनि पाँचौदिनमा डिस्चार्ज भएका हुन् ।
आज पनि १३ जना कोरोना संक्रमणबाट मुक्त, निको हुनेको संख्या २१९ पुग्यो
त्यसैगरी कोभिड-१९ युनिफाइड अस्पताल बलम्बुमा उपचाररत ११ जना पनि निको भएर घर फर्किएका छन् । उनीहरुमा ९ जना विभिन्न जिल्लामा घर भई हाल काठमाण्डौंमा रहेका हुन् । डिस्चार्ज हुनेमा ६ पुरुष र ३ महिला रहेका छन् । ७ देखि ४२ वर्ष उमेर समुहका उनीहरु १० देखि १५ दिनको अस्पताल बसाईपछि घर फर्किएका हुन् ।
त्यसैगरी सोहि अस्पतालमा उपचाररत अछाम घर भई बाँकेमा बस्ने ३२ वर्षीय पुरुष १६ दिनमा र रुकुम घर भई ललितपुरमा बस्ने २६ वर्षे पुरुष ११ दिनमा डिस्र्चाज भएका हुन् ।
यो सँगै नेपालमा हालसम्म कोरोना संक्रमणबाट मुक्त भएका २१९ पुगेका छन् । जसमा १७२ पुरुष र ४७ जना महिला रहेका छन् ।
कुन प्रदेशमा कति निको भए त ?
स्वास्थ्य मन्त्रालयका अनुसार आज (शनिबार) डिस्र्चाज भएका १३ जना सहित नेपालमा कोरोना संक्रमणबाट निको हुनेको संख्या २१९ पुगेको छ ।
जसमा प्रदेश नम्बर १ का ३०, प्रदेश २ का १०४, बाग्मती प्रदेशका २८ जना, गण्डकी प्रदेशका ३ जना, प्रदेश ५ का ४८ र सुदूरपश्चिम प्रदेशमा ६ जना गरी जम्मा २१९ जना हालसम्म डिस्चार्ज भएका छन् । जसमा १७२ पुरुष र ४७ जना महिला हालसम्म कोरोना संक्रमणबाट मुक्त भएर घर फर्किएका हुन् ।
कोरोना संक्रमणबाट हालसम्म ६ जनाको मृत्यु
नेपालमा कोरोना संक्रमणबाट मृत्यु हुनेको संख्या हालसम्म ६ पुगेको छ । पछिल्लोपटक मृत्यु भएका अर्घाखाँचीका युवा हुन् ।
अर्घाखाँचीको भुमिकास्थानका ३५ वर्षीय युवाको भारतमा मजदूरी गरेर नेपाल फर्कने क्रममा जेठ १० गते मृत्यु भएको थियो । उनको जेठ ११ गते श्वाव संकलन गरेर भैरहवाको प्रयोगशालामा परीक्षण गरिएको थियो । विहिबार आएको रिर्पोटमा उनमा कोरोना पोजेटिभ भएको पुष्टि भएको थियो । उनको शबको दाहसंस्कार भइसकेको छ ।
उनीसहित नेपालमा कोरोना संक्रमणबाट मृत्यु हुनेको संख्या ६ पुगेको छ । जसमा बुधबार (जेठ १४) गते ललितपुर बुङमति २२ का ५६ वर्षीय पुरुषको मृत्यु भएको थियो । उनको कलेजोमा समस्या भएका कारण जेठ ११ गते ललितपुरको ग्वार्कोमा रहेको किस्ट अस्पतालको आइसीमा भर्ना भएका थिए ।
उनको जेठ १२ गते कोरोना परीक्षण गरिएको थियो । जसमा रिर्पोट पोजेटिभ आएको थियो । उनको बुधबार मृत्यु भएको स्वास्थ्य मन्त्रालयले पुष्टि गरेको छ ।
त्यस्तै जेठ ४ गते मृत्यु भएका ७० वर्षीय पुरुषमा कोरोना संक्रमण भएको पुष्टि भएको छ । उनको संक्रमणबाट मृत्यु भएको पुष्टि स्वास्थ्य मन्त्रालयले जेठ १२ गते गरेको थियो ।
यसअघि जेठ ४ गते विरगन्जको नेशनल मेडिकल कलेजमा भर्ना भइ उपचार गराएका ७० वर्षीइ पुरुषको मृत्यु भएको थियो । श्वास प्रश्वासमा समस्या भएर आइसीयुमा उपचार गराएका उनको उनको मृत्यु पश्चात गरिएको श्वाव परीक्षणमा कोरोना संक्रमण भएको पुष्टि भएको थियो ।
जेठ ७ गते गुल्मी मदानेका ४१ वर्षीय शिक्षकको रुपन्देहीको क्रिमशन अस्पतालमा उपचारका क्रममा मृत्यु भएको हो ।
जेठ ४ गते बाँके नरैनापुरका २५ वर्षीय युवाको क्वारेन्टाइनमै रहेका बेला मृत्यु भएको थियो भने जेठ १ गते सिन्धुपाल्चोककी २९ वर्षीया सुत्केरी महिलाको धुलीखेल अस्पतालमा उपचारको क्रममा मृत्यु भएको थियो । उनको कोरोना संक्रमणबाट मृत्यु भएको घोषणा जेठ ३ गते गरिएको थियो । उनी कोरोना संक्रमणबाट नेपालमा मृत्यु हुने पहिलो व्यक्ति हुन् ।
वि.सं.२०७७ जेठ १७ शनिवार १८:३१ मा प्रकाशित
