हामी सबैकाे संसारन्यूज

३१ जेठ, काठमाडौँ । सरकारले हालै जारी गरेको नेपालको नयाँ नक्सासहितको निशाना छाप सम्बन्धिको संविधान संसोधनको पक्षमा रहेको बहुमत सदस्यले हात उठाएर जनाउ दिएका छन् ।

प्रतिनिधि सभाकोे आजको बैठकमा कानुन, न्याय तथा संसदीय मामिलामन्त्री शिवमाया तुम्बाहाङफेले नेपालको संविधान दोस्रो संशोधन विधेयक २०७७ माथि दफावार छलफल गरियोस भनि राखेको प्रस्तावलाई बहुमत सदस्यले हात उठाएर संविधान संसोधनको पक्षमा भएको जनाउ दिएका थिए ।

सभामुख अग्नि सापकोटाले संविधान संसोधनलाई बहमुतले पारित गरेको घोषणा गर्दै संविधान संशोधन विधेयकमाथि समाजवादीकी सांसद सरिता गिरीले दर्ता गराएको संशोधन प्रस्ताव खारेज गरिदिएका छन् । सभामुख सापकोटाले गिरीको संशोधन प्रतिनिधिसभा नियमावली, २०७५ को नियम ११२ मा रहेका संशोधनका शर्त विपरीत रहेको भन्दै खारेज गरिएको बताएका थिए ।

नेपालको वास्तविक सिमा लिम्पियाधुरा, कालापानी, लिपुलेक समेटेर हालै सार्वजनिक गरेको नेपालको नयाँ राजनीतिक तथा प्रशासनिक नक्सालाई संवैधानिक मान्यता दिने गरी सरकारले संविधान संशोधन विधेयक ल्याएको हो ।