हामी सबैकाे संसारन्यूज

३२ जेठ, काठमाण्डौं । नेपालमा शनिबार (३२ जेठ) सम्म र्यापिड र पिसीआर प्रविधि दुवैबाट ३ लाख ४४ हजार ९८ वटा कोरोना भाइरसको नमुना परीक्षण गरिएको छ ।

जसमा पछिल्लो २४ घण्टामा दुवै प्रविधिबाट २६ हजार २२८ वटा नमुना परीक्षण गरिएको स्वास्थ्य तथा जनसंख्या मन्त्रालयका प्रवक्ता जागेश्वर गौतमले जानकारी दिएका छन् ।

मन्त्रालयका अनुसार शनिबारको तुलनामा आजको परीक्षण निकै बढी हो । शनिबारको तुलनामा दुवै प्रविधिबाट आज १८ हजार ३७ वटा बढी नमुना परीक्षण गरिएको हो ।

त्यसैगरी आजसम्म पिसीआर प्रविधिबाट १ लाख ३३ हजार ३७७ र आरडिटी प्रविधिबाट २ लाख १० हजार ७२१ वटा नमुना परीक्षण गरिएको हो । जसमा पछिल्लो २४ घण्टामा ६,०८९ पिसीआर र २०,१३९ वटा र्यापिड परीक्षण गरिएको छ ।
मन्त्रालयका अनुसार हालसम्म देशका विभिन्न अस्पताल र आइसोलेसन सेन्टरमा ४,७६७ जनाको उपचार भइरहेको छ भने रेडजोनमा रहनेको संख्या हालसम्म ४९८ पुगेको छ । साथै आज भक्तपुरका १ जना रेडजोनमा परेका छन् ।
त्यसैगरी हालसम्म भारत लगायत विभिन्न देश र एक जिल्लाबाट अर्को जिल्लामा पुगेर क्वारेन्टिनमा रहनेको संख्या १ लाख ४१ हजार ६४१ पुगेको छ ।

हालसम्म नेपालमा संक्रमितको संख्या ५,३३५ पुगेको छ भने निको हुनेको संख्या आज ३६ जना थपिएसँगै ९१३ र मृतकको संख्या १८ पुगेको छ ।

आज ४२५ जनामा कोरोना संक्रमण, संक्रमितको संख्या ५,७६० पुग्यो
नेपालमा आज ४२५जना कोरोना संक्रमितका नयाँ विरामी भेटिएका छन् । स्वास्थ्य मन्त्रालयका अनुसार आज ३७५ पुरुष र ५० महिलामा संक्रमण पुष्टि भएको हो ।

आज पनि रौतहटमा सबैभन्दा ७३ जना, दाङका ५४ जना, सुर्खेतमा ४० जना, दैलेखका २९ जना,धादिङका २५ जना, डडेल्धुराका २४, कन्चनपुरका २० जना, पश्चिम नवलपरासीका २० र पाल्पाका १७ जना रहेका छन् ।

मन्त्रालयका अनुसार प्रादेशिक जनस्वास्थ्य प्रयोगशाला विराटनगरमा गरिएको परीक्षणमा संक्रमण पुष्टि भएकामा मोरङका २५ पुरुष, सुनसरीका १ र झापाका १ जना पुरुष रहेका छन् ।

कोशी अस्पताल विराटनगरको प्रयोगशालामा गरिएको परीक्षणमा सप्तरीका १ महिला र ९ पुरुष गरी १० जना, नारायणी अस्पताल विरगन्जमा गरिएको परीक्षणमा पर्साका ३ महिला र १४ पुरुष गरी १७ जना, बाराका ९ पुरुष, सर्लाहीका १ र रौतहटका ७ जना पुरुषमा संक्रमण पृष्टि भएको हो ।

प्रादेशिक जनस्वास्थ्य प्रयोगशाला पोखरामा गरिएको परीक्षणमा नवलपरासी पूर्वका २ पुरुष, सेति प्रादेशिक अस्पताल कैलालीमा गरिएको परीक्षणमा बझाङका २ महिला र ३ पुरुष गरी ५ जना, डडेल्धुराका २ महिला र २२ पुरुष गरी २४ जना, डोटीका १ महिला र २ पुरुष गरी ३ जना, कैलालीका १ महिला र ११ पुरुष गरी १२ जना, कन्चनपुरका ३ महिला र १७ पुरुष गरी २० जनामा संक्रमण पुष्टि भएको छ ।

भेरी अस्पताल बाँकेको प्रयोगशालामा गरिएको परीक्षणमा बर्दियाका १ महिला र २ पुरुष गरी ३ जना, बाँकेका ३ पुरुष, रुकुमपश्चिमका १ पुरुषमा संक्रमण पुष्टि भएको छ ।

राप्ती स्वास्थ्य विज्ञान प्रतिष्ठान दाङमा गरिएको परीक्षणमा प्युठानका २ पुरुष, दाङका १३ महिला र ४१ जना पुरुष गरी ५४ जना, प्रादेशिक जनस्वास्थ्य प्रयोगशाला जनकपुरमा गरिएको परीक्षणमा रौतहटका १ महिला र १६ पुरुष गरी १७ जना र धनुषाका १ पुरुषमा संक्रमण पुष्टि भएको हो ।

धुलिखेल अस्पतालमा गरिएको परीक्षणमा रामेछापका २ पुरुष, प्रादेशिक जनस्वास्थ्य प्रयोगशाला रुपन्देहीमा गरिएको परीक्षणमा गुल्मीका १ महिला र ७ पुरुष, नवलपरासी पश्चिमका २ पुरुष, २ महिला र १८ पुरुष, पाल्पाका १ महिला र १६ पुरुष गरी १७ जनामा संक्रमण पुष्टि भएको छ ।

प्रादेशिक अस्पताल सुर्खेतको प्रयोगशालामा गरिएको परीक्षणमा सुर्खेतका ६ महिला र ३४ पुरुष गरी ४० जना, दैलेखका ४ महिला र २५ पुरुष गरी २९ जनामा संक्रमण पुष्टि भएको छ ।

किटजन्य रोग अनुसन्धान तथा तालिम केन्द्र हेटौडामा गरिएको परीक्षणमा रौतहटका १ र सिन्धुलीका १ पुरुष रहेका छन् । शुक्रराज ट्रपिकल तथा सरुवा रोग अस्पताल टेकुमा गरिएको परीक्षणमा धादिङका ६ महिला र १९ पुरुष गरी २५ जना, राष्ट्रिय जनस्वास्थ्य प्रयोगशाला टेकुमा गरिएको परीक्षणमा रौतहटका २ महिला र ४९ पुरुष गरी ५१ जना, रुपन्देहीका ६ पुरुष र सर्लाहीका ५ पुरुषमा संक्रमण पृष्टि भएको छ ।

आज पुष्टि भएका ४२५ जनासँगै नेपालमा कोरोना संक्रमितको संख्या ५,७६० पुगेको छ । कूल संक्रमित मध्ये ५,३२४ जना पुरुष र ४३६ जना महिला रहेका छन् । हालसम्म ७३ जिल्लामा संक्रमण पुष्टि भएको छ । आज रुकुम पूर्वमा थप नयाँ संक्रमित भेटिएका छन् ।

आज ६१ जनाले कोरोनालाई जितेर घर फर्किए, निको हुनेको संख्या ८७७ पुग्यो
नेपालमा आज ६१ जना कोरोना संक्रमणबाट मुक्त भएर घर फर्किएका छन् । जसमा ६ महिला र ५५ जना पुरुष रहेका छन् ।

स्वास्थ्य मन्त्रालयका अनुसार आज संक्रमणबाट निको भएर डिस्चार्ज हुनेमा नारायणी अस्पतालबाट ३ महिला र ९ पुरुष गरी १२ जना, पाटन अस्पताल ललितपुरबाट १ पुरुष, विपी कोइराला स्वास्थ्य विज्ञान प्रतिष्ठान धरानबाट १ महिला र २ पुरुष गरी ३ जना डिस्चार्ज भएका हुन् ।

त्यसैगरी नर्सिङ इन्स्चुयुट गौर रौतहटबाट ९ पुरुष, डडेल्धुरा अस्पतालबाट ५ पुरुष, दार्चुला जिल्ला अस्पतालबाट १ पुरुष, डोटी जिल्ला अस्पतालबाट १ पुरुष, सेति प्रादेशिक अस्पताल कैलालीबाट ६ जना पुरुष डिस्चार्ज भएका छन् ।
त्यसैगरी सहपुर्व आइसोलेसन सेन्टर बाँकेबाट ६ जना पुरुष, खजुरा क्यान्सर अस्पताल बाँकेबाट ८ पुरुष, कोरोना विशेष अस्पताल दाङबाट ५ महिला र १ पुरुष गरी जम्मा ६ जना डिस्चार्ज भएका हुन् ।

आज डिस्चार्ज भएका ६१ जनासँगै नेपालमा कोरोना संक्रमणबाट निको हुनेको संख्या ९७४ पुगेको छ । जसमा पुरुष ८७७ र महिला ९७ जना रहेका छन् ।

कोरोना संक्रमणबाट आज पनि १ को मृत्यु, मृतकको संख्या १९ पुग्यो
नेपालमा आज पनि कोरोना संक्रमणबाट १ जनाको मृत्यु भएको पुष्टि भएको छ । स्वास्थ्य मन्त्रालयका अनुसार आज मृत्यु भएको पुष्टि भएकामा गुल्मी धुर्कोट गाउँपालिका वडा नं ४ जैशीथोकका ३६ वर्षीय पुरुष रहेका छन् ।

जेठ १२ गते प्रादेशिक अस्पताल रुपन्देहीको प्रयोगशालामा गरिएको परीक्षणमा उनमा कोरोना संक्रमण पुष्टि भएको थियो । रेसुङगा नगरपालिकाको उपल्लो तम्घासको अस्पतालको आइसोलेशनमा उपचार गराइरहेका उनको उपचारका क्रममा जेठ ३२ गते शनिबार राति आइसोलेशनमै मृत्यु भएको थियो । क्यान्सर रोगबाट पीडित रहेको बताइएका उनी भारतबाट आएका थिए ।

उनको मृत्युसँगै नेपालमा कोरोना संक्रमणबाट मृत्यु हुनेको संख्या १९ पुगेको छ । हालसम्म मृत्यु भएकामा १ बालिका १ महिला र १७ पुरुष रहेका छन् ।

नेपालमा आजसम्मको कोरोना अपडेटः ५,३३५ जना संक्रमित, आइसोलेशनमा ४,४०४ र १८ को मृत्यु