हामी सबैकाे संसारन्यूज

२ असार, काठमाडौँ । चीन–भारतबीच रहेको सीमा लद्दाखमा चिनियाँ सेनासँगको झडपमा तीन भारतीय मारिएका छन् ।

भारतीय सेनाको मुख्यालयले दिएको जानकारीअनुसार सोमबार राति भएको झडपमा भारतीय सेनाका एक जना अधिकारी र दुई जना जवान मारिएका हुन् । लद्दाखको गालवान उपत्यकमा दुई देशका सेनाबीच भएको झडपमा भारतीय सेनाका एक कर्णेलसहित तीन जना मारिएका हुन् । मारिने कर्णेल इन्फन्ट्री बटालियनका कमाण्डिंग अफिसर थिए।

भारतीय संचारमाध्यमका अनुसार ४५ वर्ष पछि अर्थात् सन् १९७५ पछि सीमामा यस्तो झडप भएको हो । झडपमा ढुंगामुढा र डण्डा प्रयोग गरिए पनि गोली हानाहान भने भएको थिएन ।

सो झडपमा चीनतर्फ ५ सैनिक मारिएको र ११ जवान घाइते भएको दाबा गरिएको छ । तर चिनिया संचारमाध्यमहरुले भने सीमामा तनाब भएपनि झडपमा मारिएको भन्ने बारे केही उल्लेख गरेका छैनन् ।

भारतीय सेनाका उच्च अधिकारी घटनास्थलमा पुगेको र उनीहरुबीच स्थितिलाई साम्य पार्ने विषयमा कुराकानी भइरहेको द ग्लोबल टाइम्सले जनाएको छ ।

लद्दाखको पाङगोङ सो, गल्वान, डेमचोक र दौलत बेगमा ५ हप्तादेखि दुई देशबीच बेलाबेलामा तनाव उत्पन्न हुने गरेको छ ।

भारतले सीमारेखा पार गर्दै गाल्वान उपत्यका र पाङगोङ क्षेत्रमा भौतिक संरचना निर्माण गरेपछि गत महिना चीनले लद्दाख सीमा नजिकै थप सुरक्षा फौज खटाएको थियो । त्यही क्रममा भारतीय सेना र चिनियाँ सेनाबीच झडपसमेत भएको थियो ।