Sansar News
६ असार, धनगढी । गैर आवासीय नेपाली संघ (एनआरएनए) ले सुदूरपश्चिम प्रदेशका लागि २ हजार ५ सय पीसीआर कीट उपलब्ध गराएको छ ।
गैर आवासीय नेपाली संघका पूर्व कोषाध्यक्ष तथा एनआरएन अभियन्ता हिक्मत थापा तथा ह्युमानिटी फाउण्डेसन नेपालको पहलमा एनआरएनएले सुदूरपश्चिम प्रदेशका लागि उद्योग वाणिज्य तथा आपूर्ति मन्त्री लेखराज भट्टमार्फत् २ हजार ५ सय पीसीआर किट र सोही संख्यामा भिटिएम हस्तान्तरण गरेको हो ।
एनआरएनए अन्तर्राष्ट्रिय समन्वय परिषदका कार्यकारी निर्देशक राजेश रानाले स्वास्थ्य सेवा बिभागका महानिर्देशक डा. दिपेन्द्र रमण सिंहको रोहवरमा आजमन्त्री भट्टलाई पीसीआर कीट र भिटिएम हस्तान्तरण गरेका हुन् ।
एनआरएनए अभियन्ता तथा डडेल्धुरामा पीसीआर मेसिन स्थापनाका लागि अफ्रिकाबाट अगुवाई गरिरहेका थापा र ह्युमानिटी फाउण्डेसनको समन्वयमा मन्त्री भट्ट र गैरआवासीय नेपाली संघका अध्यक्ष कुमार पन्तबीच पटकपटक भएको संवादपछि एनआरएनएले सुदूरपश्चिमका लागि पीसीआर किट र भिटिएम पठाएको हो ।
किट हस्तान्तरणका क्रममा मन्त्री भट्टले एनआरएनबाट प्राप्त पीसीआर किटमा सरकारका तर्फबाट केही किट थपेर आइतबारसम्म सुदूरपश्चिम पठाउन स्वास्थ्य मन्त्रीसंग आग्रह गरेको बताएका छन् ।
वि.सं.२०७७ असार ६ शनिवार १६:११ मा प्रकाशित
